ඊශ්‍රායලය හා ඉරානය ආශ්‍රීත කලාපයේ ඇතිව තිබෙන නොසන්සුන්තාවයක් හේතුවෙන් ඊශ්‍රායලය, ඉරානය ඇතුළු කලාපය පුරා ගුවන් කලාප හරහා ගුවන් ගමන් නතර කොට ඇති බව විදේශ සේවා නියුක්ති කාර්යාංශය නිවේදනයක් නිකුත් කරමින් පවසනවා.
කෙසේ වෙතත් ගුවන් මාර්ග වෙනස් කරමින් යුරෝපය හා ආසියාව අතර ගමන් වාර ආරම්භ කර ඇති බවත් මේ හේතුවෙන් බොහෝ ගුවන් ගමන්වල කාලය දිගු විය හැකි බවත් ඊශ්‍රායලයේ ශ්‍රී ලංකා තානාපතිවරයා විසින් පණිවුඩයක් නිකුත් කරමින් සඳහන් කර ඇති බවයි කාර්යාංශය පවසන්නේ.
ඊශ්‍රායලයට පැමිණීමට අපේක්ෂා කරන පිරිස් තම පැමිණීම නැවතු දැනුම්දෙනතුරු පමා කරන ලෙසත් ශ්‍රී ලංකාව බලා පිටත්වීමට බලාපොරොත්තුවෙන් සිටින පිරිසටද මෙම දැනුම්දීම වලංගු බවත් තානාපතිවරයා නිකුත් කළ නිවේදනයේ සඳහන් බවයි විදේශ සේවා නියුක්ත කාර්යාංශය පවසන්නේ.
ඊශ්‍රායලයේ සියලු කාර්යාල හා වැඩබිම්වල කටයුතු නවතා ඇති අතර රට පුරා හදිසි තත්ත්වයක් ප්‍රකාශයට පත් කර ඇති බවද සඳහන්.
ඊශ්‍රායලයේ සිටින ශ්‍රී ලාංකිකයන්ට තම ආරක්ෂාව සලසා ගන්නා ලෙස උපදෙස් ලබාදී ඇති අතර කිසියම් පාර්ශ්වයකින් එල්ල විය හැකි මිසයිලවලින් ආරක්ෂාව සඳහා ආරක්ෂිත කුටි ආසන්නයේ රැඳී සිටින ලෙස ඊශ්‍රායල රජය නිවේදනය කර ඇති බවද වාර්තා වනවා.
එරට ප්‍රවාහන කටයුතුද නවතා ඇති අතර සියලු දෙනාට ආරක්ෂිත ස්ථානවලට යන ලෙසටද උපදෙස් ලැබී ඇති බවයි වාර්තා වන්නේ.
කිසියම් හදිසි අවස්ථාවකදී ගිලන් රථ සේවා ක්‍රියාත්මක අතර තානාපති කාර්යාලයේ නිලධාරීන් පැය 24 පුරා දුරකථනයෙන් සම්බන්ධ කර ගත හ ැකි බවද තානාපතිවරයා පවසනවා.
සෑම අවස්ථාවකදීම බීමට අවශ්‍ය ජලය හා වියළි ආහාර ළඟ තබා ගන්නා ලෙසත් ඖෂධ භාවිත කරන පිරිස නිරන්තරයෙන් ඒවා තමාගේ ආසන්න ස්ථානයක තබාගන්නා ලෙසත් තානාපතිවරයා වැඩිදුරටත් දන්වා සිටිනවා.
