රජයේ වැදගත් අන්තර්ජාල සේවාවන් රැසකට තාවකාලිකව බලපෑම් එල්ල වී තිබෙනවා.
ඒ රජයේ ලංකා ගවර්න්මන්ට් ක්ලවුඩ් පද්ධතියේ ඇති වූ බිඳ වැටීමක් හේතුවෙන්.
තොරතුරු හා සන්නිවේදන තාක්ෂණ නියෝජිතායතනය නිවේදනයක් නිකුත් කරමින් මේ බව සඳහන් කලා.
රෙජිස්ට්‍රාර් ජනරාල් දෙපාර්තමේන්තුවේ උප්පැන්න, විවාහ සහ මරණ සහතික නිකුත් කිරීමේ පද්ධතිය, මෝටර් රථ දෙපාර්තමේන්තුවේ (බස්නාහිර පළාත හැර) e-ආදායම් බලපත්‍ර පද්ධතිය , සහ පොලිස් නිෂ්කාශන සහතික පද්ධතිය ඇතුළු සේවාවන් රැසක් මෙලෙස අඩාල වී තිබෙනවා.
මීට අමතරව කාලගුණ විද්‍යා දෙපාර්තමේන්තුව ඇතුළු තවත් ආයතන කිහිපයක වෙබ් අඩවිවලට ද මෙම තත්ත්වය බලපා ඇති බවයි එම ආයතනය සඳහන් කලේ
අඩාල වූ ක්ලවුඩ් සේවාවන් ඉක්මනින් යථා තත්ත්වයට පත් කිරීම සඳහා ICTA ආයතනයේ ඉංජිනේරුවන් සක්‍රීයව කටයුතු කරමින් සිටිනවා.
මෙම තත්ත්වය හේතුවෙන් ජනතාවට සිදුවන අපහසුතාවය පිළිබඳව තොරතුරු හා සන්නිවේදන තාක්ෂණ නියෝජිතායතනය කනගාටුව පළ කර තිබෙනවා.
උප්පැන්න සහතික පිටපත් අවශ්‍ය අයට, මුල් සහතිකය නිකුත් කළ ප්‍රාදේශීය ලේකම් කාර්යාලයෙන් අත්පිටපතක් ලබාගත හැකි බවයි රෙජිස්ට්‍රාර් ජනරාල් දෙපාර්තමේන්තුව නිවේදනය කලේ.
