ශ්‍රී ලංකාව සහ ස්විට්සර්ලන්තය අතර සංක්‍රමණ හවුල්කාරිත්වය පිළිබඳ විශේෂඥයින්ගේ තෙවන රැස්වීම පවත්වා තිබෙනවා.
එම සාකච්ඡාව පැවැත්වුණේ ස්විට්සර්ලන්තයේ බර්න් නුවරදී යි.
එහිදී 2016 වසරේ සිට සංක්‍රමණ හවුල්කාරිත්වය යටතේ ලබා ඇති ප්‍රගතිය සමාලෝචනය කර තිබෙනවා.
පසුගිය වසරේ ශ්‍රී ලංකා රජයට ද්විපාර්ශ්වික ආරක්ෂිත ශ්‍රම සංක්‍රමණ වැඩසටහන විධිමත් ලෙස භාර දීමෙන් පසු හවුල්කාරිත්වයේ අනාගත ගමන් මග පිළිබඳව මෙහිදී අවධානය යොමු කෙරුණා.
ආරක්ෂිත, ක්‍රමවත් සහ නිත්‍ය සංක්‍රමණය ප්‍රවර්ධනය කිරීම සහ සංක්‍රමණික සේවකයින් සහ ඔවුන්ගේ පවුල්වල සාමාජිකයින් යන දෙපිරිසටම සම්භව රට සහ ගමනාන්ත රට යන දෙකෙහිම සංක්‍රමණික ප්‍රතිලාභ උපරිම කිරීම මෙම වැඩසටහනේ අරමුණයි.
ජාතික මිනිස් ජාවාරම් විරෝධී කාර්ය සාධක බලකාය සමඟ සහයෝගීතාව ශක්තිමත් කිරීම පිළිබඳවද මෙහිදී අවධානය යොමු කර තිබුණා.
දෙරටෙහිම වත්මන් සංක්‍රමණික ප්‍රවණතා සහ දේශීය කුසලතා සංවර්ධන රාමුව සංවර්ධනය කිරීම සහ පිළිගැනීම තුළින් ශ්‍රී ලාංකික සේවකයින්ට ඇති අවස්ථා පිළිබඳවද දෙපාර්ශ්වය අදහස් හුවමාරු කර ඇති බවයි වාර්තා වුනේ.
