හිටපු පොලිස්පති සී.ඩී වික්රමරත්න මහතා මාලබේ පිහිටි සිය නිවසේදී ඊයේ උදෑසන වෙඩි තබාගෙන සියදිවි හානි කරගෙන තිබුණා.
මූලික විමර්ශන වලදී අනාවරණය වී ඇත්තේ වික්රමරත්න මහතා තම පෞද්ගලික ආරක්ෂකයාගේ ගිනි අවියෙන් සිය පපුවට වෙඩි තබාගෙන දිවි නසාගෙන ඇති බවයි. මාලබේ, තලාහේන ප්රදේශයේ පිහිටි හිටපු පොලිස්පති සී.ඩී වික්රමරත්න මහතාගේ නිවසේදී ඊයේ පෙරවරු 6.15ට පමණ මෙම සිදුවීම වාර්තා වී තිබුණා. උදෑසන ශරීර සුවතා ව්යායෑම් සඳහා යෑමට පෙර නිවසේ පිටතට පැමිණි වික්රමරත්න මහතා එහි වූ පුටුවක අසුන්ගෙන ඇති බවයි පැවසෙන්නේ. පොලිසිය පැවසුවේ, අනතුරුව තම පෞද්ගලික ආරක්ෂක නිලධාරියා අමතා ඔහුගේ පිස්තෝලය වික්රමරත්න මහතා විසින් ඉල්ලාගෙන ඇති බවයි. එම අවස්ථාවේදී ඔහු විසින් අදාළ නිලධාරියාට පවසා ඇත්තේ, වෙපන් එක ගේන්න. අලුත් එකක්ද? පරණ එකක්ද කියලා බලන්න ඕනේ යනුවෙන්. අනතුරුව තමාට වතුර බෝතලයක් රැගෙන එන ලෙස පවසා වික්රමරත්න මහතා විසින් පෞද්ගලික ආරක්ෂක නිලධාරියාව නිවස තුළට යවා තිබෙනවා. ඔහු ගිය පසුව වික්රමරත්න මහතා විසින් අදාළ ගිනිඅවියෙන් තම පපුවට වෙඩිතබාගෙන ඇති බවට තොරතුරු වාර්තා වන බවයි පොලිසිය සඳහන් කලේ. ඒ සමගම ක්රියාත්මක වූ නිවැසියන් කඩිනමින් ඔහුව නැගෙනහිර කොළඹ රෝහලට රැගෙන ගොස් තිබෙනවා. රෝහල් ආරංචි මාර්ග පැවසුවේ, රෝහල්ගත කරන විටත් ඔහු මියගොස් සිටි බවයි. මිය යනවිට ඔහු 63වන වියෙහි පසුවුණා. පෞද්ගලික හේතුවක් මත ඔහු දිවි නසාගෙන ඇතැයි සැකකරන අතර සිද්ධිය සම්බන්ධයෙන් පොලිස් කණ්ඩායම් දෙකක් විමර්ශන සිදුකරනු ලබනවා.
