හිටපු ජනාධිපතිවරුන්ට හිමි වරප්රසාද අහෝසි කිරීම සඳහා කෙටුම්පත් කෙරුණු හිටපු ජනාධිපතිවරුන්ගේ හිමිකම් ඉවත් කිරීමේ පනත මීට සුළු මොහොතකට පෙර පාර්ලිමේන්තුවට ඉදිරිපත් කළේ ය.
ඒ, අධිකරණ සහ ජාතික ඒකාබද්ධතා අමාත්ය හර්ෂණ නානායක්කාර විසිනි.
ඒ අනුව 1986 අංක 4 දරන ජනාධිපතිවරුන්ගේ හිමිකම් පනත යටතේ දැනට භුක්ති විඳින රාජ්ය අරමුදල් සහිත නිවාස, මාසික දීමනා, විශ්රාම වැටුප්, නිල ප්රවාහන සහ අනෙකුත් පහසුකම් වැනි ප්රතිලාභ අවලංගු කිරීමට මෙම පනත් කෙටුම්පත සකස් කර තිබේ.
මෙම මස මුලදී අමාත්ය මණ්ඩලය විසින් කෙටුම්පත ගැසට් කර පාර්ලිමේන්තුවට ඉදිරිපත් කිරීමේ යෝජනාව අනුමත කර ගැනිණි.
මෙම නව ගැසට් පත්රයට අනුව, හිටපු ජනාධිපතිවරුන්ට හෝ ඔවුන්ගේ වැන්දඹුවන්ට කලින් ලබා දී තිබූ නිවාස, මාසික මූල්ය දීමනා, ලේකම් කාර්යාල ආධාර, නිල වාහන සහ විශ්රාම වැටුප් ඇතුළු ඇතුළු වරප්රසාද හිමිකම් පනත බලාත්මක වූ දින සිට තවදුරටත් ලබා නොදෙනු ඇත.
ඒ අනුව, පනත් කෙටුම්පත පාර්ලිමේන්තුවේ සම්මත වුවහොත් චන්ද්රිකා බණ්ඩාරනායක කුමාරතුංග, මහින්ද රාජපක්ෂ, මෛත්රිපාල සිරිසේන, ගෝඨාභය රාජපක්ෂ සහ රනිල් වික්රමසිංහ යන හිටපු ජනාධිපතිවරුන්ගේ හිමිකම් අහිමි වනු ඇත.
ශ්රී ලංකාවේ පළමු සහ තුන්වන විධායක ජනාධිපතිවරුන් වන ජේ.ආර්. ජයවර්ධන සහ ඩී.බී. විජේතුංග සහ ඔවුන්ගේ වැන්දඹුවන් තවදුරටත් ජීවතුන් අතර නොමැති අතර දැනට මෙම හිමිකම් ලබන හිටපු ජනාධිපති රණසිංහ ප්රේමදාසගේ වැන්දඹු බිරිය වන හේමා ප්රේමදාසට ද නව නීතිය යටතේ ඒවා අහිමි වීමට නියමිත ය.
