කොළඹ දී සංවිධානය කර තිබූ සමගි ජනබලවේගයේ විරෝධයට පොලිසියෙන් කඳු`ඵ ගෑස් සහ ජල ප්‍රහාරයක් එල්ල කළා.
අද පස්වරුවේ එම විරෝධතා පාගමන මරදානෙන් ආරම්භ කර තිබුණා.
පළාත් පාලන ඡන්ද විමසීම කල්දැමීමට එරෙහිවයි සමගි ජන බලවේගය මෙම විරෝධතා පා ගමන ආරම්භ කර තිබුණේ.
මේ අතර සමගි ජන බලවේගයේ විරෝධතාව හේතුවෙන් පිටකොටුව ඕල්කට් මාවත ද සම්පූර්ණයෙන් වසා දැමුණා.
එමෙන්ම සමගි ජන බලවේගය විසින් අද දහවල් කොළඹදී පැවැත්වීමට නියමිතව තිබූ උද්ඝෝෂණයට අදාළව කොටුව මහෙස්ත්‍රාත් අධිකරණය නියෝගයක් නිකුත් කළා.
ඒ, කොටුව පොලිස් ස්ථානය කළ ඉල්ලීමකට අනුවයි.
ඒ අනුව සමගි ජන බලවේගයේ මහලේකම් රංජිත් මද්දුමබණ්ඩාර ඇතුළු එහි සංවිධායකයින් 7 දෙනෙකු සහ ඊට සහභාගි වන තැනැත්තන්ට මෙම නියෝගය ලබා දී තිබුණා.
ඒ අනුව ජනාධිපති කාර්යාලය, ජනාධිපති මන්දිරය, මුදල් අමාත්‍යාංශය, ගාලුමුවදොර පිටිය සහ ඒ ආශ්‍රිත මාර්ග කිහිපයකට අද පස්වරු 2 සිට රාත්‍රී 7 දක්වා කාලය තුළ ඇතුළු වීමෙන් වළකින ලෙස අදාළ නියෝගයේ සඳහන්.
මේ අතර අද දිනයේ කොළඹ නගරයේ විරෝධතා පවත්වන බවට ලැබී තිබූ තොරතුරු හේතුවෙන් ඒ සදහා පොලිස් නිලධාරින් සූදානම් කර ඇති බව පොලිස් මාධ්‍ය ප්‍රකාශක ජේ්‍යෂ්ඨ පොලිස් අධිකාරි නීතිඥ නිහාල් තල්දුව මහතා පවසනවා.
අද පැවති මාධ්‍ය හමුවකදී ඔහු මේ බව අවධාරණය කළා.
