සාදික්කා සහ කරාබු වගාවට සුළගෙන් ජලයෙන් බෝවන දිලීර රෝගයක් පැතිර යන බව අපනයන කෘෂිකර්ම දෙපාර්තමේන්තුවේ දිස්ත්‍රික්ක නියෝජ්ය අධ්යක්ෂ ශාන්ත බණ්ඩාර මහතා පවසනවා.
මෙම බෝග දෙක සදහා වෙනස් වූ දිලීර වර්ග දෙකක් පැතිර යන බවත් රෝගය වහා පාලනය නොකලොත් ඉදිරියේ දී අස්වැන්නට බලපෑමක් එල්ල වී ආදායම් අඩුවීමට ඉඩ ඇති බවත් ඒ මහතා කියා සිටියා.
මේ වන විට සාදික්කා වගාව හෙක්ටයාර් තුන් දහසක් පුරා පැතිර තිබෙන අතර වාර්ෂිකව මෙට්රික් ටොන් 2500ක් අපනයනය කරමින් රුපියල් මිලියන 2,500 ආදායමක් ලැබීමට හැකියාව ඇති බවත් කරාබු වගාව දිවයින පුරා හෙක්ටයාර් අටදහසක් පුරා පැතිර ඇති අතර එයින් වාර්ෂිකව මෙට්රික් ටොන් 6000 අපනයනය කරමින් රුපියල් මිලියන 7000 ක ආදායමක් ලැබීමට හැකි බවත් ඔහු කියා සිටියා.
මේ වන විට මහනුවර කෑගල්ල යන දිස්ත්‍රික්කවල රෝග පැතිර යාමක් දක්නට ලැබෙන අතර රෝග තත්ත්වය මත ළපටි පත්‍ර සහ ළපටි බීජ වලට දැඩි හානියක් සිදුවන බවත් ගස් අසළ මේවා වැටී තිබුණ හොත් ගසට රෝග වැළඳී ඇති බවට නිගමනය කළ හැකි
බවත් ප්‍රකාශ කළා
අංගමාර තත්ත්වයක් වැනි පුල්ලි සැදි පත්‍ර සහ ගෙඩි හැලීයාම මෙම රෝගයෙන් සිදුවන බවත් සුළඟෙන් හා ජලයෙන් බෝවන දිලීර
රෝගයක් බැවින් ඉතාමත් වේගයෙන් ව්‍යාප්ත වන මෙම රෝගය මැඩලීම සඳහා අපනයන කෘෂිකර්ම ව්‍යාප්ති නිලධාරි හමුවී උපදෙස්
ලබාගන්නා ලෙසද ශාන්ත බණ්ඩාර මහතා කියා සිටියා.
පළාත් අපනයන කෘෂිකර්ම කාර්යාලයට පැමිණ කලයුතු සායනික ප්‍රතිකාර, බෝග සනීපාරක්ෂක කර්ම පිළිබඳව නොමිලේ සිදුකරන දැනුවත් වීම් හා උපදෙස් මගින් රෝග පාලනය කිරීම සඳහා උත්සුක වන ලෙසත් ඒ මහතා වැඩිදුරටත් ප්‍රකාශ කළා.
