රුසියානු ජාතික සංචාරකයෙකුගෙන් රුපියල් 620,000ක මුදල් සොරකම් කිරීමේ සිද්ධියක් සම්බන්ධයෙන් එම සංචාරකයා නවාතැන් ගෙන සිටි උනවටුන, පිලගොඩ ප්රදේශයේ හෝටලයක හිමිකරුගේ දියණියක් අත්අඩංගුවට ගෙන තිබෙනවා.
අදාළ සොරකම සිදුවී පැය කිහිපයක් ඇතුළත 19 හැවිරිදි සැකකාරිය අත්අඩංගුවට ගෙන ඇත්තේ උනවටුන සංචාරක පොලිසියට ලද පැමිණිල්ලක් අනුවයි.
සංචාරකයාගේ කාමරයේ සඟවා තිබූ කැමරාවකින් සැකකාරිය කිහිපවතාවක් කාමරයට ඇතුළුවන ආකාරය දැක්වෙන දර්ශන ලබාගැනීමෙන් පසුව පොලිසිය අදාළ සැකකාරිය අත්අඩංගුවට ගෙන තිබෙනවා.
පොලිසිය පවසන්නේ මෙම හෝටලයේ මින් පෙරද සොරකම් රැසක් සිදුව ඇති බවයි.
අත්අඩංගුවට ගැනුණු සැකකාරිය ගාල්ල මහේස්ත්රාත් අධිකරණයට හෙට(24) ඉදිරිපත් කිරීමට නියමිත අතර උනවටුන පොලිසිය වැඩිදුර විමර්ශන සිදු කරනු ලබනවා.
