විදෙස් ශ්රමිකයින් සඳහා ස්ථිර පදිංචිය ලබාදීමට ජපානය, තීරණය කර තිබෙනවා.
විදෙස් ශ්රමිකයන්ගේ කුසලතා වර්ධනය ඉලක්ක කරගත්, තාක්ෂණික සීමාවාසික පුහුණු සංශෝධන පනතක් එරට පාර්ලිමේන්තුවේ දී වැඩි ඡන්දයෙන් ඊයේ සම්මත වුනා.
මෙම සංශෝධිත නව පනත 2027 වසරේ සිට ජපානය තුළ බලාත්මක වනු ඇති.
විදෙස් මාධ්ය සඳහන් කලේ එමඟින් සංක්රමණ පාලනය සහ සරණාගතයින් හඳුනාගැනීමේ, පෙර පැවති මූලික කරුණු ද, සංශෝධනය කර ඇති බවයි.
මෙහි ප්රධාන අරමුණ වන්නේ වසර තුනක් ඇතුළත නිශ්චිත පුහුණු සේවකයකු ලෙස ජපානය තුළ රැකියා කිරීමට, විදේශිකයන් පුහුණු කිරීමයි.
එමෙන්ම කොන්දේසිවලට යටත්ව, එකම ක්ෂේත්රයේ සේවා යෝජකයන් මාරු කිරීමට ද විදෙස් ශ්රමිකයින්ට අවසර හිමිවනු ඇති.
මේ අතර නව පනත මගින්, ජපානයේ ස්ථිර පදිංචියට අවසර හිමිවන විදෙස් ශ්රමිකයින් රජයට ගෙවිය යුතු බදු සහ අනෙකුත් ගෙවීම් හිතාමතා පැහැර හරින අවස්ථාවන්හිදී, ඔවුන්ගේ ස්ථිර පදිංචිය අවලංගු කිරීමට ද එරට රජයට බලය හිමිවනවා.
