උමා ඔය බහුකාර්ය සංවර්ධන ව්‍යාපෘතිය ජනතා අයිතියට පත් කිරීමෙන් අනතුරුව ඒ ආශ්‍රිත නායයාමක් හෝ වෙනත් ගැටළුකාරී තත්ත්වයක් මෙතෙක් වාර්තා වී නොමැති බව විදුලිබල හා බලශක්ති රාජ්‍ය අමාත්ය ඉන්දික අනුරුද්ධ හේරත් මහතා පවසනවා.
වර්ෂාපතනය සමඟ ඇති වන කුඩා දිය ඇලි පෙන්වමින් ඇතැමුන් ජනතාව නොමඟ යැවීමට උත්සාහ දරණ බවයි රාජ්‍ය අමාත්‍යවරයා පෙන්වා දෙන්නේ.
උමා ඔය ප්‍රදේශය ආශ්‍රිතව සිදුව ඇතැයි පැවසෙන ඉරිතැලීම් සහ ජල ගැලීම් සම්බන්ධයෙන් සොයා බලා වාර්තා කිරීම සඳහා භූ විද්‍යාඥයින් කණ්ඩායමක් අද අදාළ ප්‍රදේශයේ නිරීක්ෂණ චාරිකාවක නිරත වන බව රාජ්‍ය අමාත්‍යවරයා සඳහන් කළා.
ජනාධිපති මාධ්‍ය කේන්ද්‍රයේ ඊයේ පැවති මාධ්‍ය හමුවකට එක්වෙමිනුයි විදුලිබල හා බලශක්ති රාජ්‍ය අමාත්ය ඉන්දික අනුරුද්ධ හේරත් මහතා මේ බව සඳහන් කළේ.
මේ අතර වෙනසක් දැනෙන ආකාරයෙන් මැයි මාසයේදී විදුලි බිල අඩු කිරීමට බලාපොරොත්තුවන බව රාජ්‍ය අමාත්‍යවරයා පවසනවා.
උමා ඔය ව්‍යාපෘතියෙන් ලැබෙන මෙගාවොට් 120 ක ලාභයෙන් සහන දිය හැකි බවයි ඔහු පෙන්වා දෙන්නේ.
