විදුලි ගාස්තු ඉහළ දැමීමට මහජන උපයෝගීතා කොමිසමේ අනුමැතිය හිමිව තිබෙනවා.
විදුලි ගාස්තු ඉහළ දැමීම පිළිබද අවසන් තීරණයක් ගැනීම සදහා මෙම කොමිසම ඊයේ රුස්වූ අතර, එහිදී මෙම තීරණ ගනු ලැබුවා.
ඒ අනුව විදුලි ගාස්තු සියයට 36 කින් ඉහළ දැමීමට මහජන උපයෝගිතා කොමිසමේ සභාපතිවරයා ලෙස තමන් ඉදිරිපත් කළ යෝජනාව මහජන උපයෝගීතා කොමිසමේ සෙසු සාමාජිකයන් තිදෙනා ප්‍රතික්ෂේප කළ බවත් එම සාමාජිකයන් තිදෙනා විදුලිබල මණ්ඩලය යෝජනා කළ සියයට 66 ක විදුලි ගාස්තු ඉහළ දැමීමට අනුමැතිය දුන් බවත් මහජන උපයෝගිතා කොමිසමේ සභාපති ජනක රත්නායක මහතා පැවසීය.
කොමිෂන් සභාවේ සෙසු සාමාජිකයින් තිදෙනා ලෙස නීතිඥ චතුරිකා විජේසිංහ මහත්මිය, ඩග්ලස් නානායක්කාර මහතා සහ එස්. ජී. සේනාරත්න මහතා කටයුතු කරනු ලබනවා.
මෙලෙස විදුලි ගාස්තුව ඉහළ දැමීම මහජනතාව දැඩි පීඩනයකට පත්කරන මෙන්ම සමස්ත ආර්ථිකයට දරුණු බලපෑමක් කරන විදුලි ගාස්තු ඉහළ දැමීමක් බවත්, ඒ අනුව මෙම සාමාජිකයන් මහජන උපයෝගිතා කොමිෂන් සභා පනතේ සහ ලංකා විදුලිබල පනතේ ප්‍රතිපාදන උල්ලංඝනය කර ඇති බවත් රත්නායක මහතා වැඩිදුරටත් සදහන් කළා.
