2024 ඉන්දියන් ප්‍රිමියර් ලීග් ක්‍රිකට් තරගාවලියේ ක්‍රීඩක වෙන්දේසිය මේ වන විට පැවැත්වෙනවා.
එහිදී ශ්‍රී ලංකා ක්‍රිකට් කණ්ඩායමේ පන්දු යවන ක්‍රීඩක වනිඳු හසරංග ඉන්දීය රුපියල් කෝටි 1.5ක කාණ්ඩයට ඇතුළත් කර තිබෙනවා.
ඒ අනුව දැන් පැවැත්වෙන ඩුබායිහිදී දැන් පැවැත්වෙන ඉන්දීය ප්‍රිමියර් ලීග් ක්‍රිකට් තරගාවලියේ ක්‍රීඩක වෙන්දේසියේදී වනිඳු හසරංග සන්රයිසස් හයිද්‍රාබාද් කණ්ඩායම විසින් මිලදී ගෙන තිබෙනවා.
වනිදු අලෙවි වූ මිල වන්නේ ඉන්දීය රුපියල් කෝටි 1.5ක මුදලකටයි.
එය ආසන්න වශයෙන් ශ්‍රී ලංකා රුපියල් කෝටි 6කට ආසන්න මුදලක් වනවා.
වනිඳු හසරංග මින් පෙර රෝයල් චැලෙන්ජර්ස් බැංගලෝර් කණ්ඩායම වෙනුවෙන් ක්‍රීඩා කළ නමුත් මෙවර වෙන්දේසියට පෙර එම කණ්ඩායම විසින් ඔහු සිය සංචිතයෙන් නිදහස් කෙරුණා.
අයි.පී.එල්. තරග 26කට ක්‍රීඩා කර ඇති වනිදු හසරංග අයි.පී.එල්. වරම් දිනාගත්තේ 2021 වර්ෂයේදීයි.
වනිදු මෙතෙක් සහභාගි වූ අයි.පී.එල්. තරගවලිදී කඩුලු 35ක් දවා ගැනීමට සමත්ව සිටිනවා.
ශ්‍රී ලංකා වේලාවෙන් පස්වරු 1ට ආරම්භ වූ ක්‍රීඩක වෙන්දේසිය නැරඹීම සඳහා මෙවර පළමුවරට ප්‍රේක්‍ෂකයින්ටද අවස්ථාව හිමිව තිබෙනවා.
මෙවර වෙන්දේසිය සඳහා ක්‍රීඩකයින් 330කට වැඩි පිරිසක් ඉදිරිපත් කෙරෙන අතර ඉන් ක්‍රීඩකයින් 214 දෙනෙක් ඉන්දීය ක්‍රීඩකයින් වනවා.
එසේම මෙවර වෙන්දේසියට ඉදිරිපත් කෙරෙන විදෙස් ක්‍රීඩකයින්ගේ සංඛ්‍යාව 120කට ආසන්න වනවා.
මේ අතර ඩිල්ෂාන් මධුසංක, චරිත අසලංක, දසුන් ශානක, දුෂ්මන්ත චමීර, ළහිරු කුමාර සහ නුවන් තුෂාර ඉන්දීය රුපියල් ලක්ෂ 50 කාණ්ඩයට යටතේ මෙවර ක්‍රීඩක වෙන්දේසියට ඇතුළත් කර තිබෙනවා.
