ඉතා සුපරීක්ෂාකාරීව ඩිජිටල් මුදල් ඒකකයන් පිළිබඳව මේ වනවිට අධ්‍යයනය කරමින් සිටින බව මහ බැංකු අධිපති ආචාර්ය නන්දලාල් වීරසිංහ මහතා පවාසනවා .
එය ඉදිරි ගමන වෙනස් කිරීමට හැකි තීරණාත්මක සාධකයක් වනු ඇති බවයි ඔහු පෙන්වා දෙන්නේ .
නවදිල්ලි නුවර පැවති ”දකුණු ආසියාවේ ප්‍රත්‍යස්ථ වර්ධනයට මාවත“ නම් සංවාදය සඳහා එක්වෙමින් මහ බැංකු අධිපතිවරයා මේ බව ප්‍රකාශ කර තිබුණා .
අදාළ සංවාදය සංවිධානය කර තිබුනේ ජාත්‍යන්තර මුල්‍ය අරමුදල විසින් .
මේ අතර වානිජ බැංකුවලට ජනවාරි 16 වනදා සිට බලපැවැත්වෙන පරිදි සිය අතිරික්ත ද්‍රවශීලතාව නිත්‍ය තැන්පතු පහසුකම යටතේ එක්දින පදනම මත තැන්පත් කිරීමට සහ පොලිය උපයා ගැනීමට තිබූ අවස්ථාව මාසයකට උපරිම අවස්ථා 5 ක් දක්වා සීමා කර තිබෙනවා.
එසේම, සුරැකුම් මත ලබාදෙන නිත්‍ය ණය පහසුකම අදාළ දිනකදී බැංකුවේ සංචිත අවශ්‍යතාවයෙන් සියයට 90 දක්වා සීමා කිරීමටයි කටයුතු කර ඇත්තේ .
මූල්‍ය පද්ධතියේ ස්ථායිතාව ආරක්ෂා කර ගැනීම සඳහා මෙලෙස නිත්‍ය පහසුකම මත වන ඉහළ රැඳියාව අඩු කිරීමට ක්‍රියාමාර්ග ප්‍රකාශයට පත් කළ බවයි මහබැංකුව ප්‍රකාශ කළේ .
මූල්‍ය ආයතන අතර තැන්පතු සඳහා වන හිතකර නොවන තරගකාරිත්වය මෙවැනි ක්‍රියාමාර්ග හේතුවෙන් ඉවත් කරනු ඇති අතර, වෙළඳපොල ද්‍රවශීලතාව ද වර්ධනය කරනු ඇති බව මහබැංකුවේ අදහස වී තිබෙනවා .
