මාතර මහ රෝහල, කඹුරුගමුව රෝහලේ සහ මාතර දිස්ත්රික්කයේ අනෙකුත් සෞඛ්ය ආයතනවල වෛද්යවරුන් එක්ව මාතර රෝහල ඉදිරිපිට අද (28) විරෝධතාවයක නිරත වුණා.
මාතර දිස්ත්රික් මහ රෝහල හා කඹුරුගමුව නව දිස්ත්රික් රෝහල අතර 2011 සිට පැවති ස්තානමාරු ක්රමවේදය අවලංගු කිරීමට විරෝධය දක්වමින්.
ඔවුන් පවසන්නේ රෝහල් දෙක අතර 2011 සිට පැවති ස්තානමාරු ක්රමවේදය, 2024 වර්ෂයේ දී අවලංගු කිරීම හේතුවෙන් මේ වනවිට වෛද්යවරුන් 20 දෙනෙකුට අසාධාරණයක් සිදුව ඇති අතර 2024න් ඉදිරියට පැමිණ වෛද්යවරුන්ට එම රෝහල් අතර ස්තානමාරු කළ නොහැකි බවයි.
ඔවුන් චෝදනා කරන්නේ එම තීරණය අසාධාරණ බවත් එය නිවැරදි කිරීමක් සිදු නොකර ඒ වෙනුවට සෞඛ්ය අමාත්යංශය නිද්රාශිලී පිලිවෙතක් අනුගමනය කරන බවයි.
මේ සම්බන්ධයෙන් රජයේ වෛද්ය නිලධාරීන්ගේ සංගමය ද කරුණු පැහැදිලි කරමින් නිවේදනයක් නිකුත් කර තිබෙනවා.
එහි සඳහන් වන්නේ, මාතර දිස්ත්රික් මහ රෝහල සහ කඹුරුගමුව නව දිස්ත්රික් රෝහල අතර ස්ථානමාරුවීම් පිළිබඳ ගෙන ඇති හදිසි අත්තනෝමතික තීරණ හේතුවෙන් ශ්රේණි වෛද්යවරුන්ගේ 2025 වාර්ෂික ස්ථානමාරු ක්රියාවලිය අර්බුදයක පවතින බවයි.
ඔවුන් පෙන්වා දී ඇත්තේ, මෙරට සෞඛ්ය පද්ධතියේ ශ්රේණි වෛද්යවරුන්ගේ ස්ථානමාරු ක්රමවේදය ක්රියාත්මක වන්නේ ආයතන සංග්රහය, රාජ්ය කොමිෂන් සභාවේ කාර්ය පරිපාටිගත රීති සහ අදාළ වක්රලේඛයන්ට අනුකූලව බවත් එහිදී ශ්රේණි වෛද්යවරුන්ගේ වාර්ෂික ස්ථානමාරු ලැයිස්තු ක්රියාත්මක විය යුතු කාල රාමුව පවා ආයතන සංග්රහය තුළ නිශ්චිතව සඳහන් කර ඇති බවයි.
ඒ අනුව, ශ්රේණි වෛද්ය නිලධාරීන්ගේ 2025 වර්ෂයේ වාර්ෂික ස්ථානමාරු අවසන් ලැයිස්තුව 2024.11.01 දින වන විට ප්රකාශයට පත්විය යුතුව තිබුණ ද, මෙතෙක් එහි ඉල්ලුම් පත්රය පවා ප්රකාශයට පත් කිරීමට සෞඛ්ය අමාත්යංශය කටයුතු කර නැති බව සඳහන්.
සෞඛ්ය අමාත්යාංශයේ වගකිව යුතු නිලධාරීන්ගේ අකාර්යක්ෂම සහ අක්රමවත් ක්රියාකාරීත්වයට අමතරව, මාතර දිස්ත්රික්කයේ ප්රධානතම රෝහල් ද්විත්වය සම්බන්ධයෙන් ගත් අත්තනෝමතික තීරණයක්ද මීට හේතු වී ඇති බව ඔවුන් පෙන්වාදි තිබෙනවා.
