ශ්‍රී ලංකා යුද හමුදාවේ විශ්‍රාමික මේජර්වරියක වන මනිෂා ඉන්දීවරී වික්‍රමසිංහ මෙනෙවිය වැල්ලවාය, බුදුගල ආරණ්‍ය සේනාසනයේදී කරන්දෙණියේ ධම්ම නිරෝධා යන නමින් අද(27) උදෑසන සුබ මොහොතින් සසුන්ගත වීමට නියමිතයි.
බුලුගල ආරණ්‍ය සේනාසනයේ නිර්මාතෘ රතුපස්කැටියේ විමුක්තිරතන, ගලඋඩහේනේ විශුද්ධිරතන සහ බද්දේගම ජනසාර යන හිමිවරුන්ගේ උපාධ්‍යයත්වයෙන් යුතුව ඇය සසුන්ගත වීමට නියමිතව ඇත.
තිස් පස් වන වියේ පසුවන ඇය ශ්‍රි ලංකා යුද හමුදාවේ සිටි නිදහස් ආර පැරිෂුට් පැනීමේ ප්‍රථම කාන්තා නිලධාරිනියද වූවාය.
යුද හමුදාවේ රාජකාරී කරන සමයේ විවිධ අවස්ථාවලදී ඉහළ අහසේ සිට වාර හාරසිය අනූවක් පැරිෂුට් ආධාරයෙන් බිමට පැන ඇති බව විශ්‍රාමික මේජර් මනීෂා ඉන්දීවරි වික්‍රමසිංහ මෙනෙවිය පවසනවා.
එංගලන්තය, ජර්මනිය සහ දෝහා කටාර්වල පැවැති ලෝක පැරිෂුට් තරගවලටද සහභාගි වී ඉහළ අහසේ සිට බිමට පැන දස්කම් දක්වා ඇති ඇය, ශ්‍රී ලංකා මාතාවට ගෞරවයක් සහ අභිමානයක් ලබාදී ඇති නිලධාරිනියකි.
කරන්දෙණියේ පදිංචි ඇයගේ පියා ටී.ඩී. මාටින් මහතා වන අතර, මව ටී.ඩී. සෝමාවතී මහත්මියයි.
දරුවන් තිදෙනෙකුගෙන් යුත් පවුලේ එකම දියණිය වන්නේ මනීෂායි.
ඇයගේ සහෝදරයෙක්ද ශ්‍රී ලංකා යුද හමුදාවේ සෙබලෙකු ලෙසින් සේවය කරනු ලබනවා.
ගාල්ල, මඩකුඹුර ජාතික පාසලේ සහ ගාල්ල සංඝමිත්තා බාලිකා විද්‍යාලයේ දීප්තිමත් ආදි සිසුවියක වන ඇය, 2008 වසරේදී කැඩෙට් නිලධාරිනියක ලෙස දියතලාව යුද හමුදා විද්‍යාපීඨයට ඇතුළත්ව නියමිත පුහුණුවීම් ලබා දෙවැනි ලුතිතන් නිලයට පත්වූවා.
ඇය යුද හමුදාවෙන් විශ්‍රාම ලැබුවේ 2023 වසරේ ජනවාරි 04 වනදායි.
ඇය වන්නි මානුෂීය මෙහෙයුමේ අවසන් සටන් පැවැති කාලයේ මුලතිව් පුදුමාතලන් ඉදිරි ආරක්ෂක වළල්ලේද රාජකාරි කළා.
”අපේ ගෙදර තිබුණේ තනිකරම බෞද්ධ පරිසරයක්… මම පුරුද්දක් වශයෙන් කුඩා කාලයෙහි සිටම පන්සල් යනවා. ධර්ම දේශනාවලට සවන් දෙනවා. බුදු පිළිම වන්දනාමාන කිරීම සහ බෝධි පූජා පැවැත්වීමට එහා ගිය ගැඹුරු දහමක් බුදු දහමේ තිබෙන බව මට කලක් යද්දි අවබෝධ වුණා. මම හැකි සෑම අවස්ථාවකම බුදු දහමගැන ලියවුණු පොත්පත් කියෙව්වා. ඒ අනුව මනාලියක් වීමේ සිහින අතහැර පැවැදි දිවියට ඇතුළත් වීමට තීරණය කළා” යැයි ඇය පවසනවා.
ඕනෑම කෙනෙකුට ජීවිතයේ ඇති වන ඕනෑම ගැටලුවකට ප්‍රශ්නයකට බුදු දහමේ විසඳුම් තිබෙන බව තමා අවබෝධ කරගත්තේ යැයිද ඇය කියා සිටියා.
