ඉන්දියාව සමග පැවැත්වෙන තරග 4කින් යුත් බෝර්ඩර්-ගවස්කාර් ටෙස්ට් ක්‍රිකට් තරගාවලියේ තෙවැනි තරගය සදහා ඔස්ටේ්‍රලියානු කණ්ඩායමේ නායකයා ලෙස ස්ටීවන් ස්මිත් පත් කර තිබෙනවා.
ඒ, නිත්‍ය නායක පැට් කමින්ස් සිය මවගේ අසනීප තත්ත්වයක් හේතුවෙන් යළි ඔස්ටේ්‍රලියාව බලා පිටත්ව යාම හේතුවෙන්.
ආබාධ හේතුවෙන් ඩේවිඩ් වෝනර් හා ජොෂ් හේසල්වුඩ් වැනි ජ්‍යෙෂ්ඨ ක්‍රීඩකයින්ට ද ඉතිරි ටෙස්ට් තරග දෙකම මේ වන විට අහිමි වී ඇති පසුබිමකයි පැට් කමින්ස් ද තෙවැනි ටෙස්ට් තරගයෙන් ඉවත්ව ඇත්තේ.
කමින්ස් වෙනුවට වෙනත් ක්‍රීඩකයෙකු සංචිතයට ආදේශ කිරීමට ඔස්ටේ්‍රලියානු ක්‍රිකට් තේරීම් කමිටුව පියවර ගෙන නැහැ.
ස්ටීවන් ස්මිත් මීට පෙර ටෙස්ට් තරග දෙකකදී ද කමින්ස් වෙනුවට කණ්ඩායමේ නායකයා ලෙස කටයුතු කර තිබුණා.
දෙරට අතර පැවැත්වෙන තෙවැනි ටෙස්ට් තරගය ලබන පළමු වැනිදා ඉන්දෝර්හී දී ආරම්භ වීමට නියමිත අතර මේ වන විට ඉන්දියාව තරග 2-0 ක් ලෙස ටෙස්ට් තරගාවලියේ පෙරමුණ හිමි කර ගෙන සිටිනවා.
