මත්ද්‍රව්‍ය භාවිතා කරමින් සහ බීමත්ව රිය පදවන රියදුරන් සොයා සිදුකරනු ලබන පරීක්ෂණ තීව්‍ර කිරීමට පොලිසිය පියවර ගෙන තිබෙනවා. රථ වාහන පාලන සහ මාර්ග ආරක්ෂාව භාර නියෝජ්‍ය පොලිස්පති ඩබ්ලිව්. පී. ජේ. සේනාධීර මහතා සඳහන් කළේ, මේ පිළිබඳව දිවයින පුරා සිටින සියලුම රථ වාහන නිලධාරීන් දැනුවත් කිරීමට කටයුතු යොදා ඇති බවයි. දිනපතා සිදුවන මාරක සහ බරපතළ මාර්ග අනතුරු පිළිබඳ විශ්ලේෂණය කිරීමේදී, විෂ මත්ද්‍රව්‍ය භාවිතය, බීමත්ව රිය පැදවීම, අන්තරාකාරී හා අපරික්ෂාකාරී රිය පැදවීම මෙන්ම අධික වෙහෙස ඊට ප්‍රධාන වශයෙන් හේතු වී ඇති බව හඳුනාගෙන ඇති බවද නියෝජ්‍ය පොලිස්පතිවරයා මෙහිදී පෙන්වා දුන්නා. එමෙන්ම සේනාධීර මහතා වැඩිදුරටත් සඳහන් කළේ විශේෂයෙන්ම ටිපර් රථ, ලොරි රථ, ත්‍රීරෝද රථ සහ මගී බස් රථ රියදුරන් කෙරෙහි වැඩි අවධානයක් යොමු කරමින් මෙම පරීක්ෂණ ක්‍රියාත්මක කරන බවයි.
