නව නීති ප්‍රතිසංස්කරණයක් නිල වශයෙන් ක්‍රියාත්මක කර තිබෙනවා.
ඒ ශ්‍රී ලංකාවේ ව්‍යාපාරික අංශයේ මූල්‍ය විෂමාචාර මැඩපැවැත්වීම අරමුණු කරගනිමින්.
ඒ අනුව ප්‍රමාණවත් මුදල් නොමැතිව චෙක්පත් නිකුත් කිරීමේ වරද සඳහා දැඩි දඬුවම් හඳුන්වා දී තිබෙනවා.
2025 වසරේ අගෝස්තු මස 15 වන දින සිට බලපැවැත්වෙන පරිදි, 2025 අංක 13 දරන විනිමය බිල්පත් සංශෝධන පනත මගින් චෙක්පත් ආශ්‍රිත උල්ලංඝනයන් පරාසයක් සඳහා චෙක්පත් මුදලට සමාන දඩ මුදල්, වසර දෙකක් දක්වා සිර දඬුවමක් හෝ එම දඬුවම් දෙකම නියම කිරීමටයි කටයුතු කර ඇත්තේ.
මේ අනුව නව විධිවිධාන යටතේ, ගිණුමේ ප්‍රමාණවත් අරමුදල් නොමැතිව චෙක්පත් නිකුත් කිරීම , චෙක්පත් නිකුත් කිරීමේදී අයිරා සීමාවන් ඉක්මවා යාම , වසා දැමූ ගිණුම් වලින් චෙක්පත් ලිවීම සහ නීත්‍යානුකූලව වලංගු හේතුවක් නොමැතිව චෙක්පත් සඳහා ගෙවීම් නතර කිරීම යනාදිය සිදු කිරීම තුලින් දඬුවම් ලැබිය හැකියි.
නව නීතිය පිළිබඳව සමාජ මාධ්‍ය ඔස්සේ ප්‍රකාශයක් නිකුත් කරමින් විපක්ෂ මන්ත්‍රී අජිත් පී. පෙරේරා මීට පෙර පැවසුවේ, වසා දැමූ ගිණුම්වලින් නිකුත් කරන ලද චෙක්පත් පමණක් අපරාධ දඬුවම්වලට යටත් වන බවයි.
මෙම නීතිය කෙටුම්පත් කිරීම සඳහා පත් කරන ලද විශේෂඥ කමිටුව ප්‍රකාශ කර ඇත්තේ එය ව්‍යාපාරික අංශය ආරක්ෂා කිරීමට, වාණිජ ප්‍රජාව තුළ මූල්‍ය විනය වර්ධනය කිරීමට සහ ව්‍යවසායන් ඉක්මනින් බිඳ වැටීම වැළැක්වීමට ශක්තිමත් ආරක්ෂාවක් ලෙස ක්‍රියා කරන බවයි.
