ප්රධාන පෙළේ මත්පැන් සමාගමක නිෂ්පාදනය කළ මත්පැන් බෝතල් අලෙවිකිරීම සඳහා පොතුවිල් ප්රදේශයේ අලෙවිසලකට ලබාදී තිබියදී එම බෝතල්වල මූඩි සූක්ෂ්මව ගලවා මත්පැන් කොටසක් ඉවත් කර ඒවාට ජලය පුරවා අලෙවි කළ මත්පැන්හලකට සුරාබදු දෙපාර්තමේන්තුව විසින් පෙරේදා මුද්රා තබා තිබෙනවා.
පොතුවිල්හි මෙම මත්පැන් අලෙවිසලේ අලෙවි කරන ප්රධාන පෙළේ මත්පැන් සමාගමක නිපදවන මත්පැන්වල සැර අඩු බවට සුරාබදු කොමසාරිස් ජනරාල් එම්.ඩී.එන්.ඒ. පේමරත්න මහතාට ලද තොරතුරක් මත දීපව්යාප්ත සුරාබදු විශේෂ මෙහෙයුම් ඒකකයේ නිලධාරීන් යොදවා සිදුකළ පරීක්ෂාවේදී මෙම ජාවාරම හෙළි කරගෙන ඇත.
එම පරීක්ෂාවේදී ජලය මිශ්ර කර අලෙවියට තබා තිබූ මත්පැන් බෝතල් 33ක් සොයාගෙන තිබූ අතර මත්පැන්හලට මුද්රා තබා විමර්ශන අවසන් වනතෙක් මත්පැන් අලෙවිය තහනම් කිරීමට සුරාබදු කොමසාරිස් ජනරාල්වරයා විසින් පියවර ගෙන තිබෙනවා.
සුරාබදු කොමසාරිස් ජනරාල් එම්.බී.එන්.ඒ. පේමරත්න මහතාගේ උපදෙස් මත සුරාබදු අධිකාරි සුනිල් පී. ආරච්චි මහතාගේ අධීක්ෂණයෙන් දීපව්යාප්ත සුරාබදු විශේෂ මෙහෙයුම් ඒකකයේ ස්ථානාධිපති ප්රධාන සුරාබදු පරීක්ෂක නිරෝෂ් ජයකොඩි, සුරාබදු කෝප්රල්වරු වන ධර්මප්රිය ද සිල්වා (899), එම්.යූ.ආර්. මිහිරංග (1072), එම්.ආර්.ඩී. බුද්ධික (1073) හා සුරාබදු රියැදුරු ධනුෂ්ක රණසිංහ යන නිලධාරීහු වැටලීමට සහභාගි වූහ.
