වවුනියාව, නීලියාමොටෙයි ප්‍රදේශයේදී තරුණයෙකු විසින් කොටන තුවක්කුවකින් වෙඩි තබා 26 හැවිරිදි එක්දරු මවක් අද(13) අලුයම ඝාතනය කොට ඇති බව වවුනියාව, පරයානන්කුලම පොලිසිය පවසනවා.
පොලිසිය කියා සිටියේ මියගිය කාන්තාව විවාහවීමට කලින් පෙම් සම්බන්ධතාවයක් පැවැත්වූ බව කියන තරුණයෙකු විසින් 26 හැවිරිදි කාන්තාවට වෙඩි තබා ඝාතනය කොට, ඔහුද වෙඩි තබාගෙන සියදිවි නසාගෙන ඇති බවට මුලික නිරීක්ෂණවලින් තහවුරු වන බවයි.
වෙඩි තබාගෙන සියදිවි නසාගෙන ඇත්තේ නීලියාමොටෙයි ප්‍රදේශයේම පදිංචි 24 හැවිරිදි තරුණයෙකු වන බවද පොලිසිය අනාවරණය කරගෙන තිබෙනවා.
මියගිය කාන්තාවගේ සැමියා මැයි 12 වනදා රාත්‍රියේ මසුන් ඇල්ලීමට ගොස් නැවත නිවසට පැමිණි අවස්ථාවේ සිය බිරිඳ මියගොස් ඇති බවට දැක පොලිසිය දැනුවත් කර තිබෙනවා.
මියගිය කාන්තාව මීට වසර තුනකට පෙර විවාහ වී ඇති අතර, ඊට පෙර ඝාතනය කළ බව කියන තරුණයා සමඟ පෙම් සම්බන්ධතාවයක් තිබි ඇති බවයි බවයි ප්‍රදේශවාසීන් පවසන්නේ.
මියගිය අයගේ මළ සිරුරු සම්බන්ධයෙන් මහේස්ත්‍රාත් මරණ පරීක්ෂණයෙන් අනතුරුව, මළ සිරුරු පශ්චාත් මරණ පරීක්ෂණ වෙනුවෙන් වවුනියාව රෝහල් මෘත ශරීරාගාරයට යොමුකිරීමට නියමිතයි.
සිද්ධිය සම්බන්ධයෙන් පරයානන්කුලම පොලිසිය වැඩිදුර පරීක්ෂණ සිදු කරනු ලබනවා.
