නීතිවිරෝධී ලෙස මෙරටට රැගෙන එනු ලැබූ රුපියල් ලක්ෂ දහයක් වටිනා ඇන්තූරියම් පැළ තොගයක් සමග ඒවා රැගෙන ආ ශ්රී ලාංකික ගුවන් මගී කාන්තාවන් දෙදෙනෙකු අද(07) දින අලුයම අත්අඩංගුවට ගෙන තිබෙනවා.
ඒ රේගු මත්ද්රව්ය පාලන අංශයේ නිලධාරීන්, ජෛව විවිධත්ව, සංස්කෘතික හා ජාතික උරුමයන් සුරක්ෂණ අංශයේ නිලධාරීන් සහ කටුනායක ගුවන් තොටුපොළ රේගු නිලධාරීන් එක්වයි.
මොවුන් දෙදෙනාගෙන් එක් අයෙකු කොළඹ ප්රදේශයේ පදිංචි 45 හැවිරිදි කාන්තාවක් වන අතර අනෙක් තැනැත්තිය 40 හැවිරිදි වියේ පසුවන අවිස්සාවේල්ල ප්රදේශයේ පදිංචි කාන්තාවක් වනවා.
මොවුන් අද(07) දින අලුයම 12.35 ට තායිලන්තයේ බැංකොක් නුවර සිට තායි ගුවන් සේවයේ ටී.ජී.- 307 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබෙනවා.
ඔවුන් විසින් රැගෙන ආ ගමන් මලු තුළ මෙම ඇන්තූරියම් පැළ 436 ක් සඟවා ගෙන පැමිණ තිබෙනවා.
කෘෂිකර්ම දෙපාර්තමේන්තුවේ ආනයන බලපත්රය මෙම ඇන්තූරියම් පළ මෙරටට රැගෙන ඒමට ලබාගෙන නොතිබූ බවයි වාර්තා වන්නේ.
එසේම ශ්රී ලංකාවේ වනජීවි සහ වෘක්ෂලතා ආඥා පනතේ සහ ශාක නිරෝධායන පනතේ විධිවිධාන උල්ලංඝනය කරමින් මෙම පැළ තොගය රැගෙනවිත් ඇති බවටද තොරතුරු අනාවරණ වනවා.
මොවුන් දෙදෙනා අත්අඩංගුවේ තබාගෙන කටුනායක ගුවන් තොටුපොළ රේගු නිලධාරීන් මේ පිළිබද වැඩිදුර විමර්ශන කටයුතු සිදු කරමින් පවතිනවා.
