රජයට අතිවිශාල මූල්‍ය පාඩුවක් සිදුකිරීම ඇතුළු දූෂණ චෝදනා තුනක් සම්බන්ධයෙන් ඇප මත මුදා හැර සිටින ශ්‍රී ලංකන් ගුවන් සමාගමේ හිටපු සභාපති නිශාන්ත වික්‍රමසිංහ මහතාට අදාළ නඩුව ඊයේ (27) කැඳවනු ලැබුවා.
එහිදී විමර්ශන කටයුතු කඩිනම් කර අධිකරණයට වාර්තා කරන ලෙස මහේස්ත්‍රාත්වරයා නියෝග කළ අතර නඩුව යළි මැයි 29 වනදා කැඳවීමට තීරණය කළා.
2014 ජනවාරි 22 දින ක්වාලාලම්පූර් සිට කටුනායක බලා පැමිණි UL319 යානයේ ගමනාන්තය අනීතික ලෙස වෙනස් කිරීමෙන් රජයට ඇමරිකානු ඩොලර් 4,512ක පාඩුවක් සිදුකිරීම, 2014 ජනවාරි 26 වනදා මාලදිවයිනේ සිට ප්‍රංශය බලා යාමට සිටි මගීන් 75 දෙනෙකු සම්බන්ධයෙන් ගත් තීරණයක් හේතුවෙන් රජයට ඇමරිකානු ඩොලර් 19,160ක අලාභයක් සිදුකිරීම සහ 2014 දෙසැම්බර් 19 වනදා කටුනායකදී පැවති හිටපු ජනාධිපතිවරයාගේ මැතිවරණ ප්‍රචාරක රැස්වීමක් වෙනුවෙන් රජයේ මුදල් රුපියල් 1,250,000/-ක් වැය කිරීම යනාදී චෝදනා තුන අල්ලස් හෝ දූෂණ චෝදනා විමර්ශන කොමිෂන් සභාව විසින් සැකකරුට එරෙහිව ඉදිරිපත් කර තිබෙනවා.
මෙම චෝදනා සම්බන්ධයෙන් සිදුකළ විමර්ශනවලට අදාළව, 2025 ජුනි 27 වන දින නාවල ප්‍රදේශයේදී අල්ලස් කොමිසමේ නිලධාරීන් විසින් සැකකාර හිටපු සභාපතිවරයාව අත්අඩංගුවට ගෙන තිබුණා.
ඊයේ දින සැකකරු අධිකරණයේ පෙනී සිටි අතර, නඩුවේ ඉදිරි විමර්ශන කටයුතු පිළිබඳව වාර්තාවක් ලබාදෙන ලෙස අධිකරණය විසින් අල්ලස් කොමිසමට වැඩිදුරටත් අවධාරණය කළා.
