දඹුල්ල ඇතුළු නගර රැසකට පානීය ජලය ලබාදෙන ඉබ්බන්කටුව දඹුලු ඔය ජලාශයේ ජලයට අපවිත්ර ජලය එකතු කර ජන ජිවිත විනාශ කරන කණ්ඩායම් හා ඒ සඳහා වසර ගණනාවක් තිස්සේ අනුබල දීපු විවිධ සන්තෝසම් ගත්ත පුද්ගලයන්හට පවුල් පිටින් සවාරියක් යෑමට මඟ පාදාදෙන බව දඹුල්ල මහ නගර සභාවේ නියෝජ්ය නගරාධිපති සුසන්ත බටගොඩ මහතා පවසනවා.
දඹුල්ල දඹුලු ඔය ජලාශයේ ජල සම්පාදනය පොම්පාගාරය පිහිටා ඇති ප්රදේශයේ සහ ඒ ආශ්රිත ජලයේ තෙල්, ග්රීස් සාන්ද්රනය සංසරණ ජල තත්ත්ව ප්රමිතීන් ඉක්මවා ගොස් ඇති බවත් ජල තත්ත්ව විශ්ලේෂණ වාර්තා පරීක්ෂණ කිරීමේදී අනාවරණය වූ බව ජාතික ජල සම්පාදන හා ජලාපවාහන මණ්ඩලය මධ්යම පරිසර අධිකාරිය වෙත ලිඛිතව දැනුම් දී තිබෙනවා.
ඒ අනුව මධ්යම පරිසර අධිකාරිය මගින් මෙම බරපතල තත්ත්වය පිළිබඳ ආයතන අටක් දැනුවත් කොට ජලාශය අපවිත්ර වීම ගැන සාකච්ඡාව පවත්වා තිබෙනවා.
එම සාකච්ඡාවල ප්රතිඵල අනුව දඹුල්ල මහ නගර සභාව ගලේවෙල ප්රාදේශීය සභාව මහජන සෞඛ්ය පරීක්ෂක කණ්ඩායම 20 දින සිදු කරන ලද පරීක්ෂණයකදී දඹුල්ල ඉබ්බන්කටුව ප්රදේශයේ කිරි ආශ්රිත නිෂ්පාදිත කර්මාන්ත ශාලාවකින් ඉවත් කරන රසායනික ද්රව්ය සහිත ජලය කුඹුරක් හරහා දඹුලු ඔයට එක්ව ජලාශයට ගලා යන බව සොයා ගෙන තිබෙනවා.
මෙම බරපතල තත්ත්වය පිළිබඳව සොයා බැලීම සඳහා 21 දින දඹුල්ල නගරාධිපති වසන්ත කුමාර රාජමන්ත්රී නියෝජ්ය නගරාධිපති සුසන්ත බටගොඩ ගලේවෙල ප්රාදේශීය සභාවේ සභාපති ඉන්දික කරුණාරත්න දඹුල්ල නාගරික මහජන සෞඛ්ය පරීක්ෂක යොහාන් අබේවික්රම යන මහත්වරු කණ්ඩායමක් සොයා බැලීම සඳහා එහි පැමිණ සිටියා.
මෙම අවස්ථාවේ කිරි ආශ්රිත මහා පරිමාණ කර්මාන්ත ශාලාවෙන් ඉවත් කරන ජලය යොදා ඇති කුඹුරුවලින් වෙනම වර්ණක සහිත ද්රාවණයක් විශාල වශයෙන් තැන්පත් වී ඇති අයුරු දැක සුසන්ත බටගොඩ නියෝජ්ය නගරාධිපතිවරයා ඉහත ප්රකාශය සිදු කරනු ලැබුවා.
මෙහිදී ප්රදේශයේ කාන්තාවක නරාධිපතිවරයා ඇතුළු කණ්ඩායම වෙත සඳහන් කළේ වසර ගණනාවක සිට මෙම බරපතල තත්ත්වය පිළිබඳ තමන් ඇතුළු ප්රදේශවාසීන් බලධාරීන්ට දැනුම් දුන්නද කිසිදු ප්රයෝජනයක් නොමැති බවයි.
එම සියලු දෙනාම කිරි ආශ්රිත නිෂ්පාදන සන්තෝසම් ලෙස ලබාගෙන පිටව යෑම නිසා මෙම ඉවුර කලාපයේ තිබුණු ජලජ ශාක මෙන්ම නෙළුම් වගාව ද සම්පූර්ණයෙන්ම විනාශ වී දුර්ගන්ධය පවා පැවැති බව ඔවුන් සඳහන් කළා.
කෙසේ වෙතත් දඹුල්ල නගරාධිපති වසන්ත කුමාර රාජමන්ත්රී මහතා සඳහන් කළේ මධ්යම පරිසර අධිකාරිය ඇතුළු රාජ්ය ආයතන අටක් සිදු කරන ලද පරීක්ෂණය සහ සහ ඒකාබද්ධව මෙම බරපතළ ප්රශ්නය පිළිබඳව අවධානය යොමු කර ඇති අවස්ථාවක තමන් සහ ගලේවෙල ප්රාදේශීය සභාව ජනතාවගේ සෞඛ්ය ආරක්ෂාව ගැන පානීය ජලය පිළිබඳ අවධානය යොමු කොට මෙහි පැමිණි බවයි
කෙසේ වෙතත් කිසිදු තරාතිරම් නොබලා මහජනතාවට සිදුවෙන බරපතළ පානීය ජල අර්බුදයට සෞඛ්යයට මැදිහත්ව නීතිය ක්රියාත්මක කරන බවත් හෙතෙම සඳහන් කළා.
ගලේවෙල ප්රාදේශීය සභාවේ සභාපති ඉන්දික කරුණාරත්න මහතා කියා සිටියේ වහාම ක්රියාත්මක වන පරිදි මෙම ආයතනය වෙත ලබා දී ඇති පරිසර බලපත්රය අත්හිටුවා දින 14 ක් ඇතුළත වහාම පරීක්ෂණයක් කැඳවීමට තමන් නිලධාරීන්ට උපදෙස් ලබා දෙන බවයි.
පසුව මෙම කණ්ඩායම කිරි ආශ්රිත නිෂ්පාදන කම්හල වෙත ගොස් පරික්ෂා කිරීමේදීම ආයතනයේ සේවකයින් කියා සිටියේ වසර කිහිපයක් තිස්සේ මෙම පෞද්ගලික කිරි ආශ්රිත කර්මාන්ත ශාලාව පවත්වාගෙන ගියද කිසිදු ආකාරයෙන් ජලයට වස විසක් මුසුවීමට ඉඩ නොතැබූ බවයි.
කෙසේ වෙතත් ආසන්නයේ කුඹුරු හිමිකරුවකු කරන ලද ඉල්ලීමක් අනුව අර්ධ වශයෙන් පිරිපහදු කරන ලද ජලය නල මාර්ගයකින් එම කුඹුරුවලට ලබාදීම සිදු කළේ යැයි ඔවුන් පිළිගැනීම විශේෂත්වයකි.
එම ස්ථාන කන්ඩායමේ නිරීක්ෂණයට ලක්විය.
මෙම අප ජලය නිසි පිරිපහදුවකින් තොරව කිසිසේත් පරිසරයට මුදා හැරීමට නොහැකි නීතිමය තත්ත්වයක් පවතින බවද එම සේවකයන් පිළිගැනීම ද විශේෂත්වයකි.
එය තම ආයතනය සිදු කළ බවත් මින් පසුව එය නවතා දමන බවද ඔවුන් කියා සිටියා.
කෙසේ වෙතත් මේ පිළිබඳව දැඩි ලෙස අවවාද කළ දඹුල්ල නගරාධිපති වසන්ත කුමාර රාජමන්ත්රී මහතා දඹුල්ල මහජන සෞඛ්ය පරීක්ෂක යොහාන් අබේවික්රම මහතා වෙත සඳහන් කළේ වහාම සොයා බලා ඊට නිසි ලෙස නීතිය ක්රියාත්මක කරන ලෙසයි.
