තුර්කියේ වෙසෙන ශ්‍රී ලාංකිකයන් සම්බන්ධයෙන් කඩිනමින් දැනුම් දෙන්නැයි ශ්‍රී ලංකා තුර්කි තානාපති කාර්යාලය පවසනවා.
එහි තානාපති හසන්ති දිසානායක මහත්මිය පැවසුවේ තුර්කිය තුළ ශ්‍රී ලාංකිකයන් 270 දෙනෙකු පමණ රැඳී සිටින බවට තොරතුරු ලැබී ඇති බවයි.
තානාපති කාර්යාලය හරහා ලියාපදිංචි වී ඇති පුද්ගලයින් පිළිබඳ මේ වන විට සොයා බලමින් සිටින බවද ඇය සඳහන් කළා.
ආපදාවට ලක් වූ ප්‍රදේශයේ සිටි එක් කාන්තාවක් පිළිබඳව පමණක් මෙතෙක් තොරතුරක් ලැබී නොමැති බවද තුර්කියේ ශ්‍රී ලංකා තානාපතිනිය පැවසුවා.
කෙසේ වෙතත් ශ්‍රී ලාංකික එම කාන්තාවේ ජංගම දුරකථනය සොයාගෙන ඇති බවයි වාර්තා වන්නේ. එමෙන්ම ප්‍රදේශයේ සිටින 13 දෙනෙකු නිරුපද්‍රිතව සිටින බවට තහවුරු වී ඇති බවද ඇය ප්‍රකාශ කළා.
මේ අතර සිරියානු දේශසීමාවට ආසන්නව තුර්කියට බලපෑ ප්‍රබල භූකම්පනයෙන් මියගිය සංඛ්‍යාව තවත් 8 ගුණයකින් ඉහළ යා හැකි බවට ලෝක සෞඛ්‍ය සංවිධානය අනතුරු අඟවා තිබෙනවා.
සුන්බුන් අතර සිර වී සිටින පිරිස් සෙවීමේ කටයුතු අඛණ්ඩව ක්‍රියාත්මක වීම හමුවේ තවදුරටත් වාර්තා වන මරණ සංඛ්‍යාව ඉහළ යමින් පවතින බවයි වාර්තා වන්නේ.
මේ වන විට වාර්තා වී ඇති මු`ඵ මරණ සංඛ්‍යාව 4300 ඉක්මවා තිබෙනවා.
එමෙන්ම තුර්කියේ මුදාගැනීමේ මෙහෙයුම් සඳහා සහාය ලබා දීමට ශ්‍රී ලංකාවද ඉදිරිපත්ව තිබෙනවා.
ඒ ජනාධිපති රනිල් වික්‍රමසිංහ මහතාගේ උපදෙස් අනුවයි. විදේශ අමාත්‍ය අලි සබි්‍ර මහතා පැවසුවේ ඉංජිනේරු සහ වෛද්‍ය බලඇණිවල සාමාජිකයින් ද ඇතුළත්ව 300ක හමුදා සාමාජිකයන් පිරිසක් තුර්කියේ ගලවා ගැනීමේ මෙහෙයුම්වලට පිටත් කර හැරීමට සූදානම් කර ඇති බවයි.
මේ අතර ලොව බොහෝ රටවල් විශේෂඥ කණ්ඩායම් ද ඇතු`ඵව තුර්කියට සහ සිරියාවට සහන කණ්ඩායම් යොමු කිරීමට පියවර ගෙන තිබෙනවා.
