පළාත් පාලන ඡන්ද විමසීම කල් දැමීමේ නියෝගයක් නිකුත් කරන ලෙස ඉල්ලා ගොනුකර ඇති රිට් පෙත්සම වැඩිදුර සලකා බැලීම සඳහා තැපැල් ඡන්ද විමසීම ආරම්භ කිරීමට පෙර විවෘත අධිකරණයේ කැඳවන ලෙස ඉල්ලමින් ශ්‍රේෂ්ඨාධිකරණය හමුවේ මෝසමක් ගොනු කර තිබෙනවා.
පෙත්සම්කාර පාර්ශ්වයේ නීතිඥවරු විසින් මෙම මෝසම ගොනු කර ඇති බවයි අප වාර්තාකරු සඳහන් කළේ.
මෙම පෙත්සම පසුගිය සිකුරාදා එස්. තුරෙයිරාජා, ඒ.එච්.එම්.ඩී. නවාස් සහ ශිරාන් ගුණරත්න යන ත්‍රිපුද්ගල විනිසුරු මඩුල්ල හමුවේ සලකා බැලු අතර එහි වැඩිදුර සලකා බැලීම ලබන 23 වන දා තෙක් කල් දැමුණා.
කෙසේ වෙතත් තැපැල් ඡන්ද විමසීම ලබන 22 වන දා පැවැත්වීමට නියමිත බැවින් පෙත්සම වැඩිදුර සලකා බැලීම සඳහා ලබන 17, 20 හෝ 21 යන දිනවලින් එක් දිනයක් නියම කරන ලෙසයි අදාළ මෝසමෙන් ඉල්ලා ඇත්තේ.
වර්තමානයේ රට තුළ දැඩි ආර්ථික අර්බුදයක් නිර්මාණය වී ඇති බැවින් පළාත් පාලන ඡන්ද විමසීම කල් දමන නියෝගයක් නිකුත් කරන ලෙස ඉල්ලා අදාළ පෙත්සම ගොනුකර ඇත්තේ විශ්‍රාමික යුධ හමුදා කර්නල් ඩබ්ලිව්. එම්. ආර් විජේසුන්දර මහතා විසින්.
කෙසේ වෙතත් 2023 පළාත් පාලන මැතිවරණයේ තැපැල් ඡන්ද විමසීම දින නියමයකින් තොර ව කල් යන බව ශ්‍රී ලංකා මැතිවරණ කොමිසම පවසනවා.
එළැඹෙන 22,23 හා 24 යන දිනවල දී පැවැත්වීමට නියමිත ව තිබූ තැපැල් ඡන්ද විමසීමයි මෙසේ කල් යැවෙන බව වාර්තා කර ඇත්තේ.
මේ අතර, මැතිවරණ පැවැත්වීම කල් දමන ලෙස ඉල්ලා ගොනු කර තිබුණු පෙස්සම විභාගයට ගැනීම එළැඹෙන 23 වැනි දාට නියම වී තිබුණත් මෝසමක් මාර්ගයෙන් පෙත්සම්කාර පාර්ශවය ඉල්ලා සිටියේ,
තැපැල් ඡන්ද විමසීම පැවැත්වීමට නියම කර තිබූ දිනයට පෙර පෙස්සම් විභාගය කැඳවන ලෙස යි.
කෙසේ වෙතත් මාර්තු මස 9 වැනි දා පැවැත්වීමට නියමිත ව ඇති පළාත් පාලන මැතිවරණය පවත්වනවා ද නො පවත්වනවා ද පිළිබඳ තීරණයක් මැතිවරණ කොමිසම විසින් මෙතෙක් තීරණය කර නැහැ .
මේ අතර පවතින තත්ත්වය හමුවේ මේ මොහොතේ මැතිවරණයකට මුදල් වෙන්කිරීමේ හැකියාවක් නොමැති බව මුදල් රාජ්‍ය අමාත්‍ය රංජිත් සියඹලාපිටිය මහතා තමන්ට දැනුම් දුන් බව කැබිනට් ප්‍රකාශක අමාත්‍ය බන්දුල ගුණවර්ධන මහතා අද ප්‍රකාශ කළා. ඒ අමාත්‍ය මණ්ඩල තීරණ දැනුම් දීමේ මාධ්‍ය හමුවට කොළඹදී එක්වෙමින්.
මුදල් ලබා දෙන්නේ නම් පමණක් පළාත් පාලන ඡන්ද විමසීමට අදාළ ඡන්ද පත්‍රිකා මුද්‍රණය කරන බව රජයේ මුද්‍රණ දෙපාර්තමේන්තුව මැතිවරණ කොමිසමට ඊයේ දැනුම් දී තිබුණා.
මේ අතර තැපැල් ඡන්දය දින නියමයක් නොමැතිව කල් දැමීමට තීරණය කර ඇති බව මැතිවරණ කොමිසම අද දින ප්‍රකාශයට පත් කළා.
කෙසේ වෙතත් එය කුමන්ත්‍රණකාරි ක්‍රියාවක් බවයි ප්‍රජාතන්ත්‍රීය ප්‍රතිසංස්කරණ සහ මැතිවරණ අධ්‍යයන ආයතනයේ විධායක අධ්‍යක්ෂ මංජුල ගජනායක මහතා මාධ්‍ය වෙත අදහස් දක්වමින් කියා සිටියේ.
මේ අතර පවත්නා මුදල් අර්බුදය සම්බන්ධයෙන් සහ පළාත් පාලන මැතිවරණයේ ඉදිරි කටයුතු සම්බන්ධයෙන් විශේෂ සාකච්ඡාවක් අද පැවැත් වුණා.
ඒ සඳහා එක්ව සිටි ශ්‍රී ලංකා පොදු ජන පෙරමුණේ මහ ලේකම් සාගර කාරියවසම් මහතා කියා සිටියේ තැපැල් ඡන්ද පත්‍රිකා නිකුත් කිරීමේ අර්බුදයක් පවතින බවට මැතිවරණ කොමිෂන් සභාව දැනුම් දුන් බවයි.
මේ එම සාකච්ඡාවට එක් වූ අනෙකුත් දේශපාලන පක්ෂ සාමාජිකයින්.
මේ අතර සමගි ජනබලවේගය පක්ෂයේ පාර්ලිමේන්තු මන්ත්‍රී නලින් බණ්ඩාර මහතා ද පළාත් පාලන මැතිවරණය සම්බන්ධයෙන් මෙලෙස අදහස් පළ කළා.
මේ දේශපාලන වේදිකාවේ පක්ෂ විපක්ෂව දැක්වූ අදහස්.
