තායිලන්තයේ අගමැතිවරයාගේ උපදෙස් මත මෙරටට පැමිණි සිටින තායිලන්ත රාජ්‍ය ආයතන, පෞද්ගලික අංශ නියෝජනය කරන දුත පිරිසක් සහ විදුලිබල හා බලශක්ති අමාත්‍ය කංචන විජේසේකර මහතා අතර හමුවක් ඊයේ (20) එම අමාත්‍යාංශයේ දී පැවැත්විණ.
මෙම දූත පිරිස මෙරට පුනර්ජනනීය බලශක්ති ව්‍යාපෘති වෙනුවෙන් වන ආයෝජන අවස්ථා හා මෙරට විදුලිබල උත්පාදන වැඩපිළිවෙල සදහා දායකත්වය ලබාදීම වෙනුවෙන් අවබෝධය ලබා ගැනීමේ අරමුණින් මෙරටට පැමිණ ඇත.
විදුලිබල ක්ෂේත්‍රය සඳහා වන රජයේ ප්‍රතිපත්තිමය සැලසුම්, විදුලිබල පද්ධති ඒකාබද්ධ කිරීම, විදුලිබල මණ්ඩලයේ ප්‍රතිව්‍යුහගත කිරීමේ වැඩසටහන, ආයෝජන අවස්ථා සහ හරිත හයිඩ්‍රජන් වැඩසටහන මෙන්ම බලශක්ති සහයෝගිතාව සම්බන්ධයෙන් මෙම හමුවේ දී සාකච්ඡාවට ගැණින.
තායිලන්තයේ විදේශ කටයුතු අමාත්‍යාංශය, බලශක්ති අමාත්‍යාංශය, තායිලන්ත තානාපති කාර්‍යාලය, එරට විදුලිබල උත්පාදන අධිකාරිය, ග්ලෝබල් පවර් එනර්ජි සමාගම නියෝජනය කරන නිලධාරීන් සහ විදුලිබල හා බලශක්ති අමාත්‍යාංශයේ නිලධාරීන්, විදුලිබල මණ්ඩලයේ හා සුනිත්‍ය බලශක්ති අධිකාරියේ නිලධාරීන් මෙම හමුවට එක්විය.
