අමෙරිකානු ජනාධිපති ඩොනල්ඩ් ට්‍රම්ප්ගේ පාලනය විසින් රටවල් 75 ක පුරවැසියන්ට පනවන ලද සංක්‍රමණික වීසා තහනම අත්හිටුවීම නීති විරෝධී බවට තීන්දු කරමින් සම්පූර්ණයෙන්ම අවලංගු කර තිබෙනවා. ඒ මෙන්හට්න් හි ෆෙඩරල් දිස්ත්‍රික් උසාවියේ විනිසුරු ජැනට් වර්ජාස් විසින්. රජයේ සුභසාධන ප්‍රතිලාභ ලබා ගැනීමට ඉඩ ඇතැයි පවසමින් බ්‍රසීලය, කොලොම්බියාව, ඊජිප්තුව, හයිටි, සෝමාලියාව සහ රුසියාව ඇතුළු ලෝකයේ රටවල්වලින් ආසන්න වශයෙන් 40% ක පමණ ප්‍රමාණයක සංක්‍රමණික වීසා නිකුත් කිරීම රාජ්‍ය ලේකම් මාර්කෝ රුබියෝගේ උපදෙස් මත අත්හිටුවීමට රජය කටයුතු කර තිබුණා. කෙසේ වෙතත්, මෙම ප්‍රතිපත්තිය නීතියට පටහැනි බවයි විනිසුරුවරිය පෙන්වා දී ඇත්තේ. එසේම රාජ්‍ය ලේකම්වරයා විසින් කොන්සල් නිලධාරීන්ගේ බලතල ඉක්මවා කටයුතු කර ඇති බවද විනිසුරුවරිය පවසා තිබෙනවා. අමෙරිකානු නීතියට අනුව සංක්‍රමණිකයෙකු ”පොදු භාරයක්” ලෙස ප්‍රතික්ෂේප කළ හැක්කේ ඔහුගේ පුද්ගලික මූල්‍ය තත්ත්වය, වයස, සෞඛ්‍යය සහ කුසලතා මත පදනම්ව තනි පුද්ගල ඇගයීමකින් අනතුරුව පමණයි. නමුත් මෙහිදී අයදුම්කරුවන්ගේ පෞද්ගලික සුදුසුකම් නොසලකා හදිසියේම ජාතිකත්වය මත පදනම්ව පමණක් වීසා ප්‍රතික්ෂේප කිරීමට නියෝග කර තිබීම නීති විරෝධී බවයි අධිකරණය තීන්දු කළේ.
