ගලෙන්බිඳුණුවැව ගැටලාව වැවේ තිබී T56 ජීව උණ්ඩ 5038ක් සොයා ගැනීමට හැකි වූ බව ගලෙන්බිඳුණුවැව පොලිසිය පවසනවා.
පොලිසිය කියා සිටියේ පසුගිය13 වනදා 118 අංකයට ලද තොරතුරක් මත ගලෙන්බිඳුණුවැව පොලිසිය සිදු කරන ලද සෝදිසි කිරීමකදී වැවේ මඩ යට තිබී මෙම ජීව උණ්ඩ තොගය සොයා ගත් බවයි පොලිසිය පවසන්නේ.
පුදේශයේ කුඹුරු යායක වැඩ කිරීමට පැමිණි පුද්ගලයෙකු කකුල් සේදිම සඳහා වැවට ගිය අවස්ථාවේදි එම පුද්ගලයා හට උණ්ඩ කීහිපයක් හමුව තිබෙනවා.
පසුව ඒ පිළිබඳ සැකයක් මතුවී පොලිස් හදීසි ඇමතුම් අංකය 118 මගින් ආරක්ෂක අංශ දැනුවත් කිරීමට එම පුද්ගලයා කටයුතු කර තිබෙනවා.
මේ අතර ගලෙන්බිඳුණුවැව හුරුළු වැවේ දිය නෑමට ගිය තරුණයන් තිදෙනෙකුට ඔවුන් දිය නෑමට වැවට බසින ලද තොටුපල ආසන්නයේ ගල්ගොඩක තිබූ ජීව උණ්ඩ කිහිපයක් දැක පොලිසිය දැනුවත් කෙරුණා.
එදින එම ස්ථානය පරීක්ෂාවට ලක්කළ ගලෙන්බිඳුණුවැව පොලිස් ස්ථානයේ නිළධාරින් විසින් එම ස්ථානයේ තිබී T56 වර්ගයේ උණ්ඩ 10, LMG වර්ගයේ උණ්ඩ 18, අත්බෝම්බයක ගැලවී ඇති පින් 01, T56 වර්ගයේ පතොරම් ගැබක පතුල කොටසක්, පතොරම් පෙට්ටී ගැලවීමට යොදාගන්නා යතුරු 01 එම ස්ථානයෙන් සොයා ගැනුණා.
අනතුරුව එම ස්ථානය වැඩිදුරටත් පරීක්ෂා කිරීම සදහා පොලිස් විශේෂ කර්ය බලකායේ නිළධාරින් කැඳවීමට ද කටයුතු කළා.
එහිදී එස්.ටී.එෆ් නිළධාරින් සිදුකළ පරීක්ෂා කිරීමේදී ටී56 උණ්ඩ 53ක්, LMG වර්ගයේ පතොරම් 36ක්, වෙනත් වර්ගයේ පතොරම් 01ක්, 09mm කොපු 02ක් හමුවූවා.
එම සිදුවීම පිළිබඳවද අවධානය යොමු කරමින් මේ සම්බන්ධයෙන් උතුරු මැද පළාත් ජ්‍යෙෂ්ඨ නියෝජ්‍යය පොලිස්පති බුද්ධික සිරිවර්ධන මහතාගේ විශේෂ උපදෙස් අනුව කැබිතිගොල්ලෑව කොට්ඨාස භාර ජ්‍යෙෂ්ඨ පොලිස් අධිකාරී ප්‍රසන්න බ්‍රාහ්මණගේ මහතාගේ මෙහෙයවීම යටතේ ගලෙන්බිඳුණුවැව පොලිසිය වැඩිදුරටත් පරීක්ෂණ සිදුකරනු ලබනවා.
දැනට මෙම උණ්ඩ ගලෙන්බිඳුණුවැව පොලිස් ස්ථානයේ තබා ඇති අතර අද (14) වන දින කහටගස්දිගිලිය මහේස්ත්‍රාත් අධිකරණය වෙත කරුණු වාර්තා කිරීමෙන් පසු අධිකරණ නියෝගයක් මත වැඩිදුර විමර්ශන කටයුතු සිදු කිරීමට නියමිතයි.
