රත්මලාන විශේෂ ආර්ථික මධ්‍යස්ථානය ආසන්නයේ පිහිටි අරලිය නිවාස සංකීර්ණයේ සිදු කරන ලද විශේෂ වැටලීමකින් පුද්ගලයන් 15 දෙනෙක් තියුණු ආයුධ සහ මත්ද්‍රව්‍ය සමග අත්අඩංගුවට ගෙන තිබෙනවා.
පොලිසිය කියා සිටියේ අද(21) අලුයම 3 සිට උදෑසන 8 දක්වා මෙම විශේෂ මෙහෙයුම සිදු කෙරුණු බවයි.
ගල්කිස්ස කොට්ඨාසභාර ජ්‍යෙෂ්ඨ පොලිස් අධිකාරි අශෝක ගුණසේකර මහතාගේ උපදෙස් මත ගල්කිස්ස කොට්ඨාස අපරාධ විමර්ශන කාර්යාංශයේ ස්ථානාධිපතිවරයා ඇතුළු කණ්ඩායමක් මෙම මෙහෙයුමට සම්බන්ධ වී තිබෙනවා.
එහිදී විදේශගතව සැඟව සිටින සංවිධානාත්මක අපරාධකරුවන් දෙදෙනෙකුගේ උපදෙස් මත මෙරට අපරාධවල නිරත වන සාමාජිකයන් 15 දෙනෙක් අත්අඩංගුවට ගැනීමට හැකියාව ලැබී තිබෙනවා.
එසේම සැකකරුවන් සමග කඩු පහක්, ලක්ෂ අටක් පමණ වටිනා අයිස් ග්‍රෑම් 49ක් පොලිස් භාරයට ගෙන ඇති බවයි වාර්තා වන්නේ.
අත්අඩංගුවට ගත් සැකකරුවන් අතර සැකකාරියක්ද වන බවයි පොලිසිය කියා සිටියේ.
මෙලෙස අත්අඩංගුවට ගෙන ඇත්තේ විදේශගතව සැඟව සිටින සංවිධානාත්මක අපරාධ කල්ලි සාමාජිකයන් වන මහා පරිමාණ මත්ද්‍රව්‍ය ජාවාරම්කරුවෙකු වන එල්ලාවන ධර්මසිරි පෙරේරා නොහොත් ඇල්ටෝ ධර්මේ සහ කුරුවිට ආරච්චිලාගේ කවිඳු ධනංජය නොහොත් සැන්ඩෝ යන අයගේ අනුගාමිකයන් 11 දෙනෙක් සහ අපරාධ සඳහා සැකපිට පුද්ගලයෙන් දෙදෙනෙක් සහ සැකකාරියක් බවයි වාර්තා වන්නේ.
