රුපියල් ලක්ෂ දෙකහමාරක අල්ලස් මුදලක් ලබා ගැනීමේදී අත්අඩංගුවට පත් වූ ගම්පහ මූලස්ථාන පොලිසියේ අපරාධ අංශයේ ස්ථානාධිපතිවරයා කොළඹ ප්රධාන මහේස්ත්රාත් අධිකරණය විසින් අද ඇප මත මුදා හැර තිබෙනවා.
ජා-ඇල දඬුගම ප්රදේශයේ ව්යාපාරිකයෙකුගෙන් රුපියල් 250,000ක මුදලක් අල්ලස් ලෙස ලබාගන්නා අවස්ථාවේදී අල්ලස් කොමිසමේ නිලධාරීන් විසින් සැකකරු අත්අඩංගුවට ගෙන තිබුණා.
වෙනත් පුද්ගලයෙකු සොරකම් කරන ලද රන් භාණ්ඩ මිලදී ගත් බවට අදාළ ව්යාපාරිකයාට එරෙහිව නීතිමය පියවර නොගෙන සිටීම සඳහා සැකකාර නිලධාරියා රුපියල් 300,000ක මුදලක් සහ රන් පවුම් තුන්කාලක ප්රමාණයක් අල්ලස් ලෙස ඉල්ලා තිබෙනවා.
විමර්ශන අවසන් නොමැති බැවින් සැකකරුට ඇප ලබා දීමෙන් සාක්ෂිකරුවන්ට බලපෑම් ඇති විය හැකි බව අල්ලස් කොමිසම අධිකරණයට දන්වා සිටියා.
එමෙන්ම මොහුට එරෙහිව තවත් අල්ලස් පැමිණිලි ලැබීමට නියමිත බවද එහිදී සඳහන් වුණා.
සැකකරු වෙනුවෙන් පෙනී සිටි නීතිඥවරයා අධිකරණය හමුවේ කරුණු දක්වමින් කියා සිටියේ සැකකරු අපස්මාරය රෝගයෙන් පෙළෙන බවයි.
එමෙන්ම ඔහුගේ දියණිය මෙවර උසස් පෙළ විභාගයට පෙනී සිටින බවත්, අනෙක් දරුවා පෙබරවාරි මස සාමාන්ය පෙළ විභාගයට පෙනී සිටින බවත් පෙන්වා දුන් නීතිඥවරයා මානුෂීය පදනම මත ඇප ලබා දෙන ලෙස ඉල්ලා සිටියා.
ඉදිරිපත් වූ කරුණු සලකා බැලූ ප්රධාන මහේස්ත්රාත්වරයා, රක්ෂිත බන්ධනාගාරගත කර සිටි සැකකරු දැඩි ඇප කොන්දේසි මත මුදා හැරීමට නියෝග කළා.
