මධ්‍යම කඳුකරයේ බටහිර බෑවුම් ප්‍රදේශවල පිහිටි ජලපෝෂක ප්‍රදේශවලට දිනපතා පස්වරුවේ ඇදහැලෙන අධික වර්ෂාවත් සමග කාසල්රී සහ මාවුස්සාකැලේ ජලාශවල ජල මට්ටම පිටාර මට්ටමට ආසන්න වෙමින් පවතින බව එම ජලාශ භාර ඉංජිනේරුවන් පවසනවා.
කාසල්රී ජලාශය පිටාර මට්ටමට අඩි 9ක් සහ මාවුස්සාකැලේ ජලාශයේ පිටාර මට්ටමට අඩි 15ක් දක්වා ආසන්න වෙමින් පවතින බවත් ජලාශ දෙකේම ජල මට්ටම ඉහළ යාමත් සමග විමලසුරේන්ද්‍ර, ලක්ෂපාන, නව ලක්ෂපාන, කැනියොන් සහ පොල්පිටිය ජල විදුලි බලාගාරවල විදුලි උත්පාදනය උපරිම ධාරිතාවෙන් සිදු කරන බවයි එම ජලාශ භාර ඉංජිනේරුවන් පවසන්නේ.
මේ අතර පවතින වර්ෂාවත් සමග හැටන් ඩොවෝන් සහ සෙන්ක්ලෙයාර් දිය ඇලිවලට ජලධාරිතාවද ඉහළ ගොස් තිබෙනවා.
මේ අතර හැටන් ප්‍රදේශයට ඊයේ(23) පස්වරුවේ ඇද හැලුණු අධික වැසිත් සමග හැටන් දුම්රිය ස්ථානාධිපතිවරයාගේ නිල නිවස අඩි 5ක් පමණ ජලයෙන් යටවී තිබෙනවා.
හැටන් පොලිස් ක්‍රීඩාංගණය ආසන්නයේ පිහිටි මෙම නිළ නිවස ආසන්නයේ ජලය ගලා බසින බෝක්කුව මඩවලින් සිරවීම නිසා වැසි ජලයෙන් දුම්රිය ස්ථානාධිපතිවරයාගේ නිළ නිවස යට වී ඇති බවයි හැටන් දුම්රිය ස්ථානයේ සේවකයින් කියා සිටියේ.
