ලංකා ප්‍රීමියර් ලීග් තරගාවලියේ කැන්ඩි රෝයල්ස් සමඟ පැවති තරගය ලකුණු 18කින් ජයගැනීමට දඹුල්ල සික්සර්ස් කණ්ඩායම සමත්වුනා. තරගයේ ප්‍රථමයෙන් පන්දුවට පහරදුන් දඹුල්ල කණ්ඩායම නියමිත පන්දුවාර විස්ස තුළ කඩුලු 06ක් දැවී ලකුණු සංඛ්‍යාව 205ක් රැස් කිරීමටයි සමත් වුනේ. ජයග්‍රහණය සඳහා ලකුණු 206ක ඉලක්කයක් හඹා ගිය කැන්ඩි රෝයල්ස් කණ්ඩායමට නියමිත පන්දුවාර 20 තුළ කඩුලු 06ක් දැවි ලබාගැනීමට හැකි වූයේ ලකුණු 187ක් පමණයි. මෙම තරගය කොළඹ එස්.එස්.සී ක්‍රිකට් ක්‍රීඩාංගණයේදී පැවැත්වුනා. මේ අතර ක්‍රිකට් ක්‍රීඩාවේ නොමැකෙන තරුවක් වූ ශ්‍රීමත් ගාෆීල්ඩ් සෝබර්ස් මහතාට උපහාර දැක්වීමක් ඊයේ කොළඹ SSC ක්‍රීඩාංගණයේදී පැවැත්වුනා. ඒ සඳහා ඊයේ දින LPL තරග ආරම්භ වීමට පෙර විනාඩියක නිශ්ශබ්දතාවයක් රැකීමටයි ශ්‍රී ලංකා ක්‍රිකට් ආයතනය තීරණය කර තිබුනේ. එසේම ඒ මහතාට ගෞරව දැක්වීමක් වශයෙන් ඊයේ දින තරගවලට සහභාගී වන සියලුම කණ්ඩායම්වල ක්‍රීඩකයින් කළු පැහැති අත්පටි පැළඳ ක්‍රීඩා කළා. ශ්‍රීමත් ගාෆීල්ඩ් සෝබර්ස් මහතාගේ අභාවය වෙනුවෙන් ශ්‍රී ලංකා ක්‍රිකට් ආයතනය සිය සංවේගය පළකර නිවේදනයක් නිකුත් කර තිබුණා. අදාළ නිවේදනයෙන් ක්‍රිකට් ආයතනය දන්වා සිටින්නේ, ඒ මහතා ශ්‍රී ලංකා ක්‍රිකට් ක්‍රීඩාව සමග අතිශය විශේෂ වූත් , දිගුකාලීන සබඳතාවක් පැවැත්වූ විශිෂ්ටයෙකු වන බවයි.
