මෙවර ලංකා ප්‍රිමියර් ලීග් ක්‍රිකට් තරගාවලියේ 19 වැනි තරගයෙන් කලම්බු ස්ටාර්ස් කණ්ඩායම පරදා කඩුලු 8 ක ජයක් වාර්තා කිරීමට ජැෆ්නා කිංග්ස් කණ්ඩායම ඊයේ පස්වරුවේ සමත් වුණා.
කොළඹ ආර් ප්‍රේමදාස ක්‍රීඩාංගනයේ පැවැති තරගයේ පළමුව පන්දුවට පහරදුන් ස්ටාර්ස් කණ්ඩායම නියමිත පන්දුවාර 20 තුළ කඩුලු 9ක් දැවී ලබා ගත් ලකුණු සංඛ්‍යාව 128 ක්.
දිනේෂ් චන්දිමාල් හා නිරෝෂන් දික්වැල්ල ලකුණු නොලබා දැවී ගිය අතර, නිශාන් මදුෂ්ක ලකුණු 35 ක් ලබා ගත්තා.
ඩොමිනික් ඩ්‍රකේස් ලකුණු 38 යි. පන්දු යැවීමේ දී තිසර පෙරේරා හා ෂොයිබ් මලික් කඩුලු 2 බැගින් බිද හෙලුවා.
පිළිතුරු ඉනිම ක්‍රීඩා කළ කිංග්ස් කණ්ඩායම ඉනිම නිමා වීමට පන්දු 25 ක් ඉතිරිව තිබියදී ජයග්‍රාහී ඉලක්කය පසු කළේ කඩුලු 2 ක් පමණක් දැවී සිටියදීයි.
එහිදී රහ්මනුල්ලාහ් ගුර්බාස් පන්දු 40කින් ලකුණු 69 ක් රැස් කළ අතර, අවිශ්ක ප්‍රනාන්දු ලකුණු 40 ක් ලබා ගත්තා.
පන්දු යැවීමේ දී ඩොමිනික් ඩ්‍රකේස් හා ජෙෆ්රි වැන්ඩර්සේ කඩුල්ල බැගින් බිද හෙලුවා.
ඒ අනුව ජැෆ්නා කිංග්ස් කණ්ඩායම මූලික වටය අවසන් කළේ ක්‍රීඩා කළ තරග 8 න් 6 ක් ජය ගනිමින් ප්‍රසාද ලකුණු සටහනේ දෙවැනි ස්ථානය දිනා ගනිමින්.
කලම්බු ස්ටාර්ස් කණ්ඩායම ක්‍රීඩා කළ තරග 8 න් ජය ගත් තරග ගණන 3ක්.
කෙසේ වෙතත්, මෙම කණ්ඩායම් දෙකම අවසන් වටය සදහා සුදුසුකම් ලබා ගැනීමට සමත් වුණා.
මේ අතර මෙවර ලංකා ප්‍රිමියර් ලීග් ක්‍රිකට් තරගාවලියේ අවසන් වටය සදහා සුදුසුකම් ලබා ගැනීමට ගෝල් ග්ලැඩියේටර්ස් කණ්ඩායම ඊයේ රාත්‍රියේ සමත් වුණා.
කෙසේ වෙතත්, තරගාවලිය යටතේ අද පැවැති මූලික වටයේ අවසන් තරගයෙන් දඹුල්ල අවුරා කණ්ඩායම හමුවේ ගාලු කණ්ඩායම පරාජයට පත් වූයේ කඩුලු 4කින්.
ප්‍රසාද ලකුණු සටහනට අනුව ග්ලැඩියේටර්ස් කණ්ඩායම තරග 8 කින් 2ක් ජය ගනිමින් සිව්වැනි ස්ථානය තහවුරු කර ගත් අතර, දඹුල්ල ඕරා කණ්ඩායම තරග 8කින් තරග 2 ක් ජය ගනිමින් හිමි කර ගත්තේ 5 වැනි හා අවසන් ස්ථානයයි.
කොළඹ ආර් ප්‍රේමදාස ක්‍රීඩාංගනයේ පැවැති තරගයේ කාසියේ වාසිය දිනූ ගාලු කණ්ඩායම පළමුවෙන් පන්දුවට පහරදීමට තීරණය කළ අතර, ඔවුන් නියමිත පන්දුවාර 20 තුළ කඩුලු 8 ක් දැවී ලබා ගත් ලකුණු සංඛ්‍යාව 129 ක්.
නුවනිදු ප්‍රනාන්දු පන්දු 42 කින් නොදැවී ලකුණු 63 ක් වාර්තා කිරීමට සමත් වුණා.
පන්දු යැවීමේ දී මැතිව් ෆෝර්ඩ් ලකුණු 11 කට කඩුලු 4 ක් දවා ගත්තා.
පිළිතුරු ඉනිම ක්‍රීඩා කළ දඹුල්ල අවුරා කණ්ඩායම පන්දුවාර 14 යි පන්දු 2 ක් අවසානයේ කඩුලු 6 ක් දැවී ජයග්‍රාහී ඉලක්කය පසු කිරීමටයි සමත් වුණේ .
එහිදී මැතිව් ෆෝර්ඩ් පන්දු 30 කින් ලකුණු 52 ක් රැස් කළ අතර, ජෝර්ඩන් කොක්ස් පන්දු 21 කින් ලකුණු 34 ක් ලබා ගත්තා. පන්දු යැවීමේ දී නුවන් තුෂාර හා ඉමාඩ් වසීම් කඩුලු 2 බැගින් බිද හෙලුවා.
ඒ අනුව තරගාවලියේ අවසන් වටයේ පළමු තරගය ප්‍රසාද ලකුණු සටහනේ පෙරමුණේ පසු වන කැන්ඩි ෆැල්කන්ස් කණ්ඩායම හා දෙවැනි ස්ථානයේ පසු වන ජැෆ්නා කිංග්ස් කණ්ඩායම අතර පැවැත්වීමට නියමිතයි.
එම තරගය එළඹෙන 21 වැනිදා පස්වරු 3ට කොළඹ ආර් ප්‍රේමදාස ක්‍රීඩාංගනයේ දී පැවැත්වීමට නියමිතව තිබෙනවා.
