එප්පාවල ඇඳගල ප්‍රදේශයේ යතුරු පැදි සේවා ස්ථානයක් (සර්විස් සෙන්ටර්) හා ඊට යාබදව පිහිටි නිවසක ඊයේ (22) රාත්‍රියේ ඇති වූ ගින්නකින් එම යතුරු පැදි සේවා ස්ථානය හා නිවස සම්පූර්ණයෙන් ගිනිබත්ව තිබෙනවා.
විදුලි කාන්දුවක් නිසා ගින්න ඇති වෙන්නට ඇතැයි සැක පළ කරන අතර,ගින්නෙන් නිවස හා යතුරු පැදි සේවා ස්ථානය සම්පූර්ණයෙන්ම විනාශ වී ඇත. මෙම ගින්නෙන් කිසිදු ජීවිත හානියක් හෝ තුවාලයක්ද සිදුව නැත.
රාත්‍රී 7.30 ට පමණ මෙම ගින්න හටගෙන තිබෙනවා.
ගින්න හට ගන්නා අවස්ථාවේ යතුරු පැදි සේවා සැපයුම් ස්ථානය වසා දමා තිබී ඇති අතර, ඊට යාබද කඩකාමරයේ පිහිටි නිවසේ එහි හිමිකාරිය, සිය පුතු හා මව සමඟ නිවසේ මුළුතැන් ගෙයි රැදී සිට තිබෙනවා.
එක්වරම නිවසේ විදුලිය විසන්ධි වීම හේතුවෙන් ඒ පිළිබඳ විපරම් කර බැලීමේදී නිවසේ එක් කොටසක් ගිනි ගන්නා ආකාරය දැක තිබෙනවා.
ඒ අනුව අසල්වාසීන්ගේද සහය ඇතිව ගින්න මැඩ පැවැත්වීමට උත්සහ කළද ගින්න පැතිර ගොස් ඇත්තේ යතුරු පැදි සේවා ස්ථානය තුළ ලිහිසි තෙල්, ටයර්, ලිපි ලේඛන ආදී වහා ගිනි ඇවිලෙන සුළු ද්‍රව්‍ය පැවතීම හේතුවෙන්.
නිවසට ගින්න පැතිරී යාම හේතුවෙන් නිවසේ නිදන කාමරය හා එම නිවසේ වෙසෙන පාසල් දරුවන් දෙදෙනාගේ පොත් පත්ද සම්පූර්ණයෙන්ම විනාශ වී තිබෙනවා.
එප්පාවල පොලීසිය, ප්‍රදේශවාසීන් එක්ව තරමක් දුරට ගින්න මැඩ පැවැත්වීමට පසුව හැකි වූ අතර, අනුරාධපුර මහ නගර සභාවේ ගිනි නිවීම් ඒකකය පැමිණ ගින්න සම්පූර්ණයෙන්ම මැඩ පවත්වා තිබෙනවා.
සිද්ධිය සම්බන්ධයෙන් එප්පාවල පොලීසිය වැඩිදුර පරීක්ෂණ සිදු කරති.
