කෙහෙල්බද්දර පද්මේ , කමාන්ඩෝ සලින්ද නොහොත් පිට්ටුවා, පානදුරේ නිලංග , බැකෝ සමන් සහ තැඹිලි ලහිරු යන පාතාලයේ අපරාධකරුවන් පස් දෙනා මෙරටට රැගෙන ඒමට මේ වන විට සියල්ල සූදානම් බව වාර්තා වනවා .
බොහෝ විට ඔවුන් රැගත් ගුවන් යානය හෙට දිනයේ දී ඉන්දුනීසියාවේ සිට ශ්‍රී ලංකාව බලා පැමිණෙනු ඇති බව සඳහන්.
කෙහෙල්බද්දර පද්මේ ඇතුළු පිරිස ලංකාවට රැගෙන ආ පසු ප්‍රශ්න කිරීම් හමුවේ තොරතුරු රැසක් අනාවරණය කර ගැනීමට හැකි වනු ඇති බව පොලිසිය විශ්වාස කරනවා.
මෙම අපරාධකරුවන් විදේශගතව සිට මෙරට අපරාධ මෙහෙයවීමට යොදාගත් ජංගම දුරකථන ඇතුළු උපාංගද ඉන්දුනීසියානු පොලිස් භාරයට ගෙන තිබුණා.
එම උපකරණ ද මෙරටට ලැබෙනු ඇති බවත් ඒ ඔස්සේ මෙම අපරාධකරුවන් සමඟ සම්බන්ධකම් පැවැත්වූ පොලිස් නිලධාරීන්, දේශපාලනඥයන්, මාධ්‍යවේදීන් ඇතුළු විශාල පිරිසකගේ තොරතුරු අනාවරණය කර ගැනීමට හැකිවනු ඇති බව පොලිසිය විශ්වාස කරනවා.
ඒ අනුව ඉන්දුනීසියානු පොලිසියේ නිලධාරීන් ද 10 දෙනකුගේ ආරක්ෂාවක් සහිතව හෙට රාත්‍රියේ මෙම පාතාල අපරාධකරුවන් ඉන්දුනීසියාවෙන් මෙරට බලා ගුවන් ගත වීමට නියමිතව තිබෙනවා.
