විදේශ කටයුතු රාජ්‍ය අමාත්‍ය තාරක බාලසූරිය මහතා පසුගියදා (27) ලාඕසයේ පැවති ආසියාන් කලාපීය සංසදයේ 31 වැනි අමාත්‍ය මණ්ඩල රැස්වීම අමතමින් කෘත්‍රිම බුද්ධිය වැනි නව සහ නැගී එන තාක්ෂණයන්හි අනිසි භාවිතය වැළැක්වීමට අවශ්‍ය පියවර ගැනීමේ අරමුණින් ඒවායේ ආරක්ෂාව ඇතුළු නැගී එන අභියෝගවලට සාමූහික විසඳුම් ලබා දීම කෙරෙහි අවධානය යොමු කරන ලෙස ආසියා පැසිෆික් කලාපයෙන් ඉල්ලා සිටියේය.
සාමය, ආරක්ෂාව සහ සහයෝගිතාව ප්‍රවර්ධනය කිරීම සඳහා ආසියා පැසිෆික් කලාපයේ ප්‍රයත්නයන් අඛණ්ඩව පවත්වා ගැනීමට අමතරව, සයිබර් සහ ජාල ආරක්ෂණ පද්ධති සඳහා පවතින අභියෝගවලට මුහුණ දීම සහ අන්තර්ජාතික සංවිධානාත්මක අපරාධ මැඩලීම සඳහා සංසදය පියවර ගත යුතු බව විදේශ කටයුතු රාජ්‍ය අමාත්‍යවරයා වැඩිදුරටත් ප්‍රකාශ කළේය.
කලාපයේ සමහර ප්‍රදේශවල සිදුවන සයිබර් අපරාධ මධ්‍යස්ථාන සහ රැකියා ජාවාරම්වලට එරෙහිව තීරණාත්මක ක්‍රියාමාර්ග ගන්නා ලෙස ඔහු ඉල්ලා සිටියේය.
ආසියාන් සංවිධානයේ සභාපතිත්වය දරන ලාඕ මහජන ප්‍රජාතන්ත්‍රවාදී ජනරජයේ නියෝජ්‍ය අගමැති සහ විදේශ අමාත්‍ය සලියම්සයි කොමාසි මහතා විසින් ආසියාන් කලාපීය සංසදයේ සාමාජිකයින් 27 දෙනෙකු සහභාගීත්වයෙන් පැවති මෙම වසරේ සංසදයේ අමාත්‍ය මණ්ඩල රැස්වීමේ මුලසුන දරන ලදී.
