සෞඛ්‍ය හා ජනමාධ්‍ය අමාත්‍යාංශය විසින් ක්‍රියත්මක කරනු ලබන ආරෝග්‍යා සුවතා මධ්‍යස්ථාන දහසේ ව්‍යාපෘතිය අද නිල වශයෙන් ආරම්භ වනවා. ඒ, විෂය භාර අමාත්‍ය වෛද්‍ය නලින්ද ජයතිස්ස මහතාගේ ප්‍රධානත්වයෙන්. ඒ අනුව කළුතර දකුණ සුවතා මධ්‍යස්ථානයට මුල්ගල තැබීම පෙරවරු 09.00ට සිදු කෙරෙනු ඇති. ඊට සමාගමීව දිස්ත්‍රික් මට්ටමින් ද වැඩසටහන් සංවිධාන කර තිබෙනවා. මෙම ව්‍යාපෘතියෙන් බෝ නොවන රෝග පාලනයට හා වැළැක්වීමේ සත්කාරයට ප්‍රමුඛත්වය දෙමින් ප්‍රාථමික සෞඛ්‍ය සේවාවේ නව හැරවුමක් සනිටුහන් කරනු ලබනවා. මෙම මධ්‍යස්ථාන සම්ප්‍රදායික, බෙහෙත් ශාලාවකට හෝ බාහිර රෝගි අංශයකට සීමා නොවන බව සඳහන්. රෝගාතුර වූ පසු ප්‍රතිකාර කිරීමට වඩා රෝග ඇතිවීම කල්තියා වළක්වා ගැනීම සහ සමස්ත ශාරීරික සුවතාව ප්‍රවර්ධනය කිරීම මෙහි මූලික අරමුණ වනවා. සෑම මධ්‍යස්ථානයකටම වෛද්‍යවරයෙකු, ප්‍රජා හෙද කාර්ය මණ්ඩලයක් සහ සම්බන්ධීකරණ නිලධාරීන් අනුයුක්ත කිරීමට සැලැසුම් කර තිබෙනවා.
