ආනයනික පොල්තෙල් හේතුවෙන් දේශීය පොල්තෙල් කර්මාන්ත ශාලා 1500 ක් පමණ වැසී ගොස් ඇති බව පොල් හා පොල් ආශ්‍රිත නිෂ්පාදකයින්ගේ සංගමය පවසනවා.
රටේ වාර්ෂික පොල්තෙල් අවශ්‍යතාවය මෙටි්‍රක්ටොන් දෙලක්ෂ හතලිස් දහසක් වන අතර ඉන් පොල්තෙල් කිලෝ එක් කෝටි හැත්තෑ හත් ලක්ෂයකට වැඩි ප්‍රමාණයක් ආනයනය කරනු ලබනවා.
ඒ සඳහා රුපියල් මිලියන 7891 ක් වැය වන බවයි පොල් හා පොල් ආශ්‍රිත නිෂ්පාදකයින්ගේ සංගමය සහ කෘෂිකර්ම හා වැවිලි කර්මාන්ත අමාත්‍යාංශයේ නිලධාරීන් අතර පැවති සාකච්ඡාවකදී අනාවරණය වී ඇත්තේ.
මේ අතර හිටපු ජනාධිපති ගෝඨාභය රාජපක්ෂ මහතාගේ පාලන සමයේදී තහනමට ලක් කළ කටුපොල් වගාව යළි ආරම්භ කිරීම සදහා ක්‍රියාමාර්ග ගනිමින් සිටින බව හිටපු මුදල් අමාත්‍ය රවි කරුණානායක මහතා පවසනවා.
කටුපොල් වගාකරුවන් සමග පැවති සාකච්ඡාවකින් අනතුරුව අදහස් දක්වමින් ඒ මහතා කියා සිටියේ කටුපොල් වගාව තහනම් කිරීම හේතුවෙන් ගොවි පවුල් විශාල ප්‍රමාණයක් ආර්ථික ගැටලු රැසකට මුහුණ දෙමින් සිටින බවයි.
තම ඉඩම් මෙන්ම රජයේ ඉඩම්වල කටුපොල් වගා කිරීමට අවසර ලබාදුනහොත් රබර් වගාවට වඩා වැඩි විදේශ විනිමයක් රටට ලබාගත හැකි බවටයි ඒ මහතා වැඩිදුරටත් අවධාරණය කර ඇත්තේ.
