අට වන ජනාධිපති රනිල් වික්‍රමසිංහ මහතා පත්වූ දා සිටම කරන්නේ උගුල් අටවන එක බව සමගි ජන බලවේගයේ කොළඹ දිස්ත්‍රික් පාර්ලිමේන්තු මන්ත්‍රී එස්.එම්. මරික්කාර් මහතා පවසනවා.
ඔහු මේ බව කියා සිටියේ පුනරුත්ථාපන අධිකාරී පනත සම්බන්ධනේ පාර්ලිමේන්තුවේ අද(18) පැවැත්වෙන විවාදයට එක්වෙමිනි.
එහිදී වැඩිදුරටත් අදහස් දැක්වූ මන්ත්‍රීවරයා මෙලෙස කියා සිටියා.
මේ අටවන ජනාධිපති පත් වෙච්චචි දා ඉඳන් උගුල් අටවන්නමයි බලාගෙන හිටියේ… හැමදාම කළේ පත්වෙච්චි දා ඉඳලා උගුල් අටවන එක… මේ පුනරුත්ථාපන පනත කොච්චර පරණයි කියලා විජයදාස රාජපක්ෂ ඇමතිතුමා කිව්වත්… මං එතුමාට නෙවෙයි කියන්නේ… මේක මේ අටවන ජනාධිපතිගේ උගුලක් ඇටෙව්ව… මේකට මම උසාවි ගියා. උසාවි ගිහිල්ලා උසාවියෙන් තීන්දුව හම්බවෙච්චි හින්දා ශ්‍රේෂ්ඨාධිකරණ හරි තීන්දුව දුන්න නිසා තමයි මේක මත්ද්‍රව්‍ය හා මත්උවදුරට ඇබ්බැහි වූවන්ට පමණක් සීමා වුණේ.
නැත්නම් හැදුවේ ගෙනල්ලා මර්දනය කරන්න… අරගල කරන කට්ටියව… උද්ඝෝෂණය කරන අයව… ජනතාවගේ ප්‍රජාතන්ත්‍රවාදී අයිතිවාසිකම් වෙනුවෙන් පෙනී සිටි අයව බය කරලා හිරේ දානවා කියලා ගෙනාපු… අර ඒ දවස්වල තමයි හිටියේ මම හිට්ලර් වගේ කිය කියා හිටියේ…. විජේදාස රාජපක්ෂ ඇමතිතුමාට මතක ඇති… මම ඒත් කල්පනා කළා මිස්ටර් බීන්ව කොහොමද හිට්ලර් වෙන්නේ කියලා… ඒ නිසා මම පැහැදිළිව කියන්න කැමැතියි… අටවන උගුල්වල සීමාවක් තියෙන්නේ ඕනි නියෝජ්‍ය කතානායක තුමනි… දැන් මැතිවරණය කල්දාන්න අටවනවා උගුල් අටවනවා ඉවරයක් නෑ… ඉස්සෙල්ලා කිව්වා ඡන්දේ තියන්න සල්ලි නැහැ කියලා. රුපියල් බිලියන දෙදාහක් සල්ලි අච්චු ගහලා මේ රටේ උද්ධමනය සියයට 60කට එහා ගෙනියපු අය තමයි කියන්නේ සල්ලි නැහැ කියලා.
රුපියල් බිලියන 10… එතකොට මේ රුපියල් බිලියන 10 එකපාර දෙන්න ඕනිත් නෑ… ඒ විදිහට රටේ ආර්ථිකය කාබාසිනිය කරපු මේ දේශපාලනඥයෝ ඡන්දෙ තියන්න සල්ලි නෑ කියලා කියනවා… එහෙනම් රටේ ආර්ථිකය කාපු අය හැමදාම ජනාධිපතිකමේ ඉන්න ඕනි… අගමැතිකමේ ඉන්න ඕනි… ඒ ආණ්ඩුවම හැමදාම ඉන්න ඕනි… ඒ නිසා රට හරිමගට ගන්න තමයි ඡන්දෙ ඕනයි කියන්නේ.
පාර්ලිමේන්තු මන්ත්‍රී එස්.එම්. මරික්කාර් මහතා පාර්ලිමේන්තුවේදි කරන ලද සම්පූර්ණ ප්‍රකාශය පහතින් නරඹන්න.
