විපක්ෂ නායක සජිත් ප්රේමදාස මහතා සහ ඉන්දීය මුදල් අමාත්ය නිර්මලා සීතාරාමන් මහත්මිය අතර හමුවක් පවත්වා තිබෙනවා .
ඒ ඉන්දියාවේ නවදිල්ලියේ පිහිටි මුදල් අමාත්යාංශයේදීයි.
මෙම දිනවල ඉන්දියාවේ නිල සංචාරයක නිරත විපක්ෂ නායක සජිත් ප්රේමදාස මහතා අද ද්විපාර්ශ්වික ආර්ථික සහයෝගීතාව සහ කලාපීය ඒකාබද්ධතාවය ගැඹුරු කිරීම පිළිබඳ සාකච්ඡා කිරීමේ අරමුණින් ඉන්දියාවේ මුදල් අමාත්ය නිර්මලා සීතාරාමන් මහත්මිය හමු වුණා.
මෙහි දී ඉන්දීය මුදල් අමාත්යවරිය ශ්රී ලංකාවේ ස්වභාවික දායාද සහ මානව කුසලතා සම්බන්ධයෙන් අගය කල අතර ඉන්දියාවේ වෙනස්වන ආර්ථිකය සමඟ සමීපව සම්බන්ධ වීමෙන් මෙම ශක්තීන් ගොඩනැගීමේ වැදගත්කම සඳහන් කළා.
එසේම ඉන්දියාව වැනි විශාල වෙළෙඳපලකට ප්රවේශ වීමෙන් ශ්රී ලංකාවේ කර්මාන්ත වේගයෙන් වර්ධනය විය හැකි බවයි අමාත්යවරිය මෙහිදී සදහන් කලේ .
ඇය, ශක්තිමත් දේශීය කර්මාන්ත හරහා ශ්රී ලංකාවේ ආර්ථික ස්වෛරීභාවය වැඩි දියුණු කළ හැකි බව ද අවධාරණය කළා.
එසේම 2022 වසරේ පැවති අර්බුදකාරී තත්වය අතරතුර ඉන්දියාව ලබා දුන් ඇමරිකානු ඩොලර් බිලියන 4ක සහයෝගයට මෙහි දී විපක්ෂ නායක සජිත් ප්රේමදාස මහතා සිය ස්තූතිය පළ කරනු ලැබුවා .
තනි ජාතියක් විසින් ශ්රී ලංකාවට ලබා දුන් විශාලතම මූල්ය ප්රදානය එය බවයි විපක්ෂනායකවරයා පැවසුවේ .
තවද කාර්මික ප්රතිපත්තිය සහ ඩිජිටල් පාලනය සම්බන්ධයෙන් ඉන්දියාවේ ජයග්රහණ අගය කිරීමටද විපක්ෂ නායක සජිත් ප්රේමදාස මහතා මෙහිදී කටයුතු කළා .
ශ්රී ලංකාව තවමත් විදේශ සංචිත නැවත ගොඩනැගීම, අපනයන විවිධාංගීකරණය කිරීම සහ දරිද්රතාවය අඩු කිරීම ඇතුළු ප්රධාන අභියෝගවලට මුහුණ දෙන බවයි ඔහු සදහන් කලේ .
නවීන වෙළෙඳ යථාර්ථයන්ට ගැලපෙන පරිදි ඉන්දු-ලංකා නිදහස් වෙළඳ ගිවිසුම යාවත්කාලීන කරන ලෙස ද සජිත් ප්රේමදාස මහතා මෙහිදී ඉල්ලා සිටියා.
මේ අතර විපක්ෂ නායක සජිත් ප්රේමදාස මහතා නවදිල්ලියේ දී ඉන්දීය කර්මාන්ත සම්මේලනය හමුවී සුවිශේෂ කරුණු රැසක් සම්බන්ධයෙන් සාකච්ඡා පවත්වා තිබුණා .
මේ සදහා එම සම්මේලනයේ ජ්යෙෂ්ඨ නියෝජිතයින් පිරිසක් එක්ව සිටියා.
ඒ වෙළෙඳාම, ආයෝජන සහ තාක්ෂණය යන ක්ෂේත්රවල ද්විපාර්ශ්වික සහයෝගීතාව ශක්තිමත් කිරීම සඳහා පුළුල් කථිකාවතක් ගොඩනැංවීමේ අරමුණින් යුතුවයි .
වෙළෙඳාම සහ ආයෝජන ප්රවාහයන් ඉහළ නැංවීම සඳහා ඉන්දියා-ශ්රී ලංකා ඒකාබද්ධ ආර්ථික කොමිසම යටතේ වෙළෙඳ පහසුකම් සැපයීමේ ක්රියාකාරී කණ්ඩායමක් පිහිටුවීමට විපක්ෂ නායක සජිත් ප්රේමදාස මහතා මෙහිදී යෝජනා කරනු ලැබුවා .
මෙහිදී ඉන්දියානු කර්මාන්ත සඳහා කැප වූ ඉන්දියා-ශ්රී ලංකා ඒකාබද්ධ කාර්මික හා තාක්ෂණ වෙළෙඳ කලාපයක් ශ්රී ලංකාවේ නිර්මාණය කිරීමට ද විපක්ෂනායකවරයා යෝජනා කළා.
එසේම පුනර්ජනනීය බලශක්තිය, කෘෂි සැකසුම්, සැපයුම්, සංචාරක සහ අර්ධ සන්නායක වැනි ප්රමුඛතා අංශ හඳුනා ගැනීම සඳහා ශ්රී ලංකා- CII ව්යාපාරික සංසදයක් පිහිටුවීමට ද විපක්ෂ නායකවරයා මෙහිදී යෝජනා කර තිබුණා.
