බදු ප්රතිපත්තියට එරෙහිව වෘත්තීයවේදින්ගේ වෘත්තිය සමිති එකමුතුව ආරම්භ කළ වෘත්තිය සමිති ක්රියාමාර්ගවල ත්රිව්රතාවය අඩු කිරීමට එම එකමුතුව ඒකමතිකව තීරණය කර තිබෙනවා.
ඒ ඔවුන් ඉදිරිපත් කළ යෝජනාවලට ජනාධිපති ලේකම්වරයාගෙන් ලිඛිතව ලැබුණු ධනාත්මක ප්රතිචාරයන් සැලකිල්ලට ගනිමින්.
එමෙන්ම එළෙඹෙන සතියේදී ජනාධිපතිවරයා සමග සාකච්ඡාවක් පැවැත්වීමට නියමිතව ඇති බවද අද කොළඹ පැවති මාධ්ය හමුවකට එක්වෙමින් වෘත්තියවේදින්ගේ වෘත්තිය සමිති එකමුතුව කියා සිටියා.
මේ අතර මෙම ක්රියාමාර්ගවලට සමගාමිව රජයේ වෛද්ය නිලධාරින්ගේ සංගමය ආරම්භ කළ වර්ජනය හෙට පෙරවරු 8 ට තාවකාලිකව අවසන් කරන බවයි එහිදි අදහස් දැක්වූ රජයේ වෛද්ය නිලධාරින්ගේ සංගමයේ මාධ්ය ප්රකාශක වෛද්ය චමිල් විජේසිංහ මහතා කියා සිටියේ.
මේ අතර අද පෙරවරු 8 ට ආරම්භ කළ වැඩ වර්ජනය හෙට දින අත්හිටුවන බව ලංකා බැංකු සේවක සංගමය පවසනවා.
එමෙන්ම දුම්රිය වැඩවර්ජනය හේතුවෙන් අද පස්වරුවේ දුම්රිය 9 ක් පමණක් ධාවනය කරන බව දුම්රිය දෙපාර්තමේන්තුව පැවසුවා.
ඒ අනුව ප්රධාන සහ උතුරු මාර්ගයේ දුම්රිය 4 ක් සහ මුහුදුබඩ සහ පුත්තලම මාර්ගවල දුම්රිය 2ක බැගින්ද, කැළණි වැලි මාර්ගයේ ද ආදි වශයෙන් එම දුම්රිය ධාවනය වන බවයි එම දෙපාර්තමේන්තුව සදහන් කළේ.
මේ අතර ලංකා පෞද්ගලික බස් හිමියන්ගේ සංගමයේ සභාපති ගැමුණු විජේරත්න මහතා කියා සිටියේ වෘත්තිය සමිතිවල සහභාගිත්වයෙන් ආරම්භ කළ වර්ජනය අසාර්ථක එකක් බවයි.
අද දින වෙනදාටත් වඩා බස් ධාවනය සිදු කිරීමට කටයුතු කළ බවයි ඒ මහතා වැඩිදුරටත් කියා සිටියේ.
ජනතාව ආර්ථික වශයෙන් දැඩි පීඩනයට ලක්ව සිටින මොහොතක වැඩ වර්ජන ක්රියාමාර්ගයකට යාම සාධාරණ නොවන බව ජනතා විමුක්ති පෙරමුණේ දේශපාලන මණ්ඩල සභික ලාල් කාන්ත මහතා පවසනවා.
රට යහපත් තත්වයකට පත්වෙමින් ඇති මොහොතක සියලු වැඩකටයුතු අඩාල කිරීමට කටයුතු කිරීම කිසිවිටෙකත් අනුමත කළ නොහැකි බව පාර්ලිමේන්තු මන්ත්රී එස්.එම්.චන්ද්රසේන මහතා අද කොළඹ පැවති මාධ්ය හමුවකට එක් වෙමින් කියා සිටියා.
මේ අතර වෘත්තිය සංගම් අද දිනයේ ගෙන තිබෙන වෘත්තිය සමිති ක්රියාමාර්ග හමුවේ දිවයිනට පැමිණ සිටින විදෙස් සංචාරකයින් රැසක් අපහසුතාවයට පත්ව සිටින බව අප වාර්තාකරුවන් පවසනවා.
එමෙන්ම ජනාධිපති මාධ්ය අංශය නිවේදනයක් නිකුත් කරමින් කියා සිටියේ අද දින ක්රියාත්මක වූ වැඩවර්ජනය සදහා ඇතැම් වෘත්තිය සමිති සහයෝගය නොදක්වා සේවයට වාර්තා කර ඇති බවයි.
ඒ අනුව අද පෙරවරුවේ දුම්රිය සේවකයින් වෘත්තිය සමිති ක්රියාමාර්ගය නොතකමින් මගින්ගේ පහසුව උදෙසා දුම්රිය ගමන් වාර 20 ක් පමණ ක්රියාත්මක කළ බවද දුම්රිය දෙපාර්තමේන්තුවේ සාමාන්යාධිකාරිවරයා විසින් ජනාධිපති මාධ්ය අංශයට තහවුරු කර ඇති බවද සදහන්.
එමෙන්ම ඉන්ධන තොග බෙදා හැරීමේ කටයුතු ද කිසිදු අපහසුතාවයකින් තොරව කළ බවද ඛනිජ තෙල් සංස්ථාව ජනාධිපති මාධ්ය ඒකකයට පවසා ඇති බව සදහන්.
ලංකා බැංකු ශාඛා මෙන්ම මහජන බැංකු ශාඛාවල ද සාමාන්ය පරිදි සිය සේවාවන් සිදු වූ බවට තහවුරු කර තිබෙනවා.
කෙසේ වෙතත් වරාය වෘත්තිය සමිති මේ වන විටත් වැඩ වර්ජනයේ නිරත වී සිටින අතර එහි සේවා ක්රියාත්මක නොවුන බවයි වාර්තා වන්නේ.
වරායේ ආරක්ෂාව සදහා නාවිකා හමුදාව ද යොදවා ඇති බව සදහන්.
වරාය අධිකාරියේ සභාපතිවරයා ඇතු`ඵ පාලන අධිකාරියේ පිරිසක් වරාය සේවකයන්ට රාජකාරිවල නිරත වන ලෙස දැනුම් දීම හේතුවෙන් සේවකයන් ඊට විරෝධය පළ කිරීමත් සමග උණුසුම් තත්වයක් හට ගෙන තිබෙනවා.
