විදේශිකයන් මෙරටට පැමිණිමේදී එක් පුද්ගලයෙකුට දින 30ක වීසා බලපත්රයක් සඳහා අය කළ ඩොලර් 50ක පැරණි ගාස්තුව එලෙසම පවත්වා ගෙන යාමට ඊයේ පැවති කැබිනට් මණ්ඩල හමුවේදී තීරණය කර තිබෙනවා.
එමෙන්ම ඉන්දියාව, චීනය, රුසියාව, ජපානය, මැලේසියාව, තායිලන්තය, ඉන්දුනීසියාව යන රටවල් හතට මෙතෙක් නොමිලේ සැපයු වීසා සේවාව එලෙසම ක්රියාත්මක කරන බවයි ජනාධිපති මාධ්ය අංශය සඳහන් කළේ.
මෙරටට විදේශිකයෙකු ඇතුල් වීමේදී අදාළ වීසා නිකුත් කිරීමේ පූර්ණ වගකීම ආගමන විගමන දෙපාර්තමේන්තුව සතු බව ද රජය අවධාරණය කරනු ලබනවා.
සංචාරක කර්මාන්තයේ සාර්ථක ප්රගතියක් මේ වන විට රට තුළ ඇති වී තිබෙන බැවින්, මෙම ගාස්තුව ඩොලර් 50ක සීමාවේ පවත්වාගෙන යන ලෙස සංචාරක ක්ෂේත්රයේ නියුතු පාර්ශ්ව රැසක් පසුගිය දින කිහිපය තුළ ජනාධිපති රනිල් වික්රමසිංහ මහතාගෙන් ඉල්ලීම් කර තිබුණා.
එමෙන්ම එය සංචාරක කර්මාන්තයේ ඉදිරි අභිවෘද්ධියට විශාල පිටිවහලක් වන බවයි ඔවුන් එහිදී වැඩිදුරටත් පෙන්වා දී ඇත්තේ.
ඒ අනුව ජනාධිපති රනිල් වික්රමසිංහ මහතා ඊයේ පැවති කැබිනට් මණ්ඩල හමුවට මේ පිළිබඳ කරුණු ඉදිරිපත් කිරීමෙන් අනතුරුව මෙම තීරණය ගත් බව ජනාධිපති මාධ්ය අංශය වැඩිදුරටත් සඳහන් කළා.
