ඉන්දියාව හා ශ්‍රී ලංකාව අතර විවිධ විෂයන් සම්බන්ධයෙන් පර්යේෂණ සහයෝගිතාව ගොඩනැංවීම සඳහා විශාල විභවයක් ඇතිබව කොළඹ, ස්වාමි විවේකානන්ද සංස්කෘතික මධ්‍යස්තානයේ අධ්‍යක්ෂ මහාචාර්ය අංකුරන් දත්තා පවසනවා. ඔහු පෙනවා ශ්‍රී ලංකාව හැමවිටම ඉන්දියාව අනුගමනය කලබව විස්වාස කරන බවයි.
එහෙත් ශ්‍රී ලංකාව තුළ සාර්ථක වූ බොහෝ වැඩසටහන් පසුකාලීනව ඉන්දියාව තුළ ආරම්භ කර ඇතිබවයි ඔහු පෙන්වා දුන්නේ. ඉන්දියාවේ හා ශ්‍රී ලංකාවේ අධ්‍යාපන ආයතනවල ආදි ශිෂ්‍යයන් සම්බන්ධ කිරීම අරමුණුකරගත් වේදිකාවක්වන INDO – LANKA EDU Net හි සංවිධානය හා වෙබ් අඩවිය එලිදැක්වීමේ අවස්තාවට ඊයේ කොළඹ දී එක්වෙමින් ඔහු මේබව ප්‍රකාශ කලා.
දෙරටේම සිසුන් සඳහා සහයෝගිතාව වර්ධනය කිරීම හා අධ්‍යාපන අවස්තා නිර්මාණය කිරීමේ අරමුණින් ශ්‍රී ලංකාවේ පදිංචි ඉන්දියානු විශ්ව විද්‍යාලවල සිසුන්ගේ ජාලයක් පිහිටුවීම මෙහි ප්‍රධාන අරමුණයි.
මෙම අවස්තාවට INDO – LANKA EDU Net හී අධ්‍යක්ෂ කුශාන් ඇන්තනී ද එක්ව සිටියා. ඔහු එහිදී පැවසුවේ සෑම වසරකම ඉන්දියාව ශ්‍රී ලංකාව වෙත අධ්‍යාපනික ශිෂ්‍යත්ව ඇතුලු විවිධ අවස්තා ලබා දෙන බවයි. ඒ සම්බන්ධයෙන් මෙරට ප්‍රජාව දැනුවත් කිරීමද මෙහි අරමුණක් බවයි ඔහු පෙනවා දුන්නේ.
