නව ප්‍රජාතන්ත්‍රවාදී පෙරමුණ විසින් ජාතික ලැයිස්තු මන්ත්‍රී ධුරයක් සඳහා රවී කරුණානායක මහතා පත් කිරීම ගැටළු සහගත බව එම පක්ෂයේ හවුල්කාර පාර්ශව පවසනවා.
රවී කරුණානායක මහතාගේ නම මැතිවරණ කොමිසමට යවා ඇත්තේ නව ප්‍රජාතන්ත්‍රවාදී පෙරමුණට සහය දක්වන අනෙකුත් පක්ෂවල කිසිදු අනුමැතියකින් තොරව බවයි ඔවුන් සදහන් කලේ.
එම පෙරමුණේ නියෝජිතයන්ට හිටපු ජනාධිපති රනිල් වික්‍රමසිංහ මහතා දැනුම් දී ඇත්තේ අත්නෝමතික ආකාරයකට මෙම නම් කිරීම සිදුකර ඇති බවයි.
ඒ අනුව හිටපු අමාත්‍යවරයෙකු වන රවී කරුණානායක මහතාට එරෙහිව ගත හැකි විනය ක්‍රියාමාර්ග පිළිබඳව සාකච්ඡා කිරීමට එක්සත් ජාතික පක්ෂ මන්ත්‍රීවරුන් ඊයේ පස්වරුවේ හදිසි රැස්වීමක්ද පවත්වනු ලැබුවා.
නව ප්‍රජාතන්ත්‍රවාදී පෙරමුණට හිමි ජාතික ලැයිස්තු මන්ත්‍රී ධුර දෙක සම්බන්ධයෙන් එම පෙරමුණේ සියලු පක්ෂ අද පෙරවරුවේ කොළඹ දී රැස්වී තීරණයක් ගැනීමට නියමිතයි.
එලෙස සිදු කිරීමට සියලු කටයුතු සුදානම් කර තිබෙන අතරවාරයෙයි එම පක්ෂයේ ලේකම්වරිය අත්තනෝමතිකව මෙලෙස රවී කරුණානායක මහතාගේ නම මැතිවරණ කොමිසමට යවා ඇත්තේ.
