යාපනය චුන්නාක්කම් ප්රදේශයේදී අද පස්වරුවේ වාහන දෙකක් එකිනෙකට ගැටීමට සලස්වමින් සිදු කරන ලද ගැටුමකින් පුද්ගලයින් හය දෙනෙකු තුවාල ලබා තිබෙනවා.
පුද්ගල කණ්ඩායම් දෙකක් අතර වූ ගැටුමක් දුරදිග යාමෙන් එක් කණ්ඩායමක් ගමන් ගත් කැබ් රථයක් සහ මෝටර් රථයක් මෙලෙස එකිනෙකට ගැටීමට සලස්වා ඇති අතර ඉන් අනතුරුව දෙපිරිස අතර ගුටි බැට හුවමාරුවක් ද සිදු වී ඇති බවයි අප වාර්තාකරු පැවසුවේ.
යාපනය චුන්නාක්කම් පොලිසිය කියා සිටියේ වාහන දෙකක් අනතුරට ලක් වීමෙන් පසුව දෙපිරිසක් එකිනෙකාට පහර දී ඇති අතර පුද්ගලයන් හය දෙනෙකු මෙලෙස තුවාල ලබා ඇති බවයි.
තුවාලකරුවන් යාපනය රෝහලට ඇතුලත් කර ඇති අතර අනතුරෙන් වාහන දෙකටම බරපතල හානි සිදු වී ඇති බව සඳහන්.
යාපනය ප්රදේශවාසීන් පැවසුවේ වික්ටර් කල්ලිය නමින් හඳුන්වන කල්ලියක් සහ තවත් කල්ලියක් අතර ඇති වූ ගැටුමක ප්රතිඵලයක් මත මෙලෙස වාහන එකිනෙකට ගැටීමට සලස්වා ගැටුමක් ඇති කරගෙන ඇති බවයි.
