2023 පළාත් පාලන ආයතන ඡන්ද විමසීමට අදාලව මුදල් නිදහස් කිරීම සඳහා හෙට දින මුදල් අමාත්‍යාංශ ලේකම්වරයා සහ නිලධාරින් කැදවා සාකච්ඡා කරන බව මැතිවරණ කොමිෂන් සභාවේ සභාපති නිමල් පුංචිහේවා මහතා පවසනවා.
සැලසුම් කළ පරිදි තැපැල් ඡන්දය සලකුණු කිරීමට නියමිත දිනයේදී සිදු කිරීමට උත්සහ කරන බවයි ඔහු වැඩිදුරටත් කියා සිටියේ.
ඡන්ද පත්‍රිකා මුද්‍රණය කිරීම ඇතුලු පළාත් පාලන ආයතන ඡන්ද විමසීමට අදාළ මුද්‍රණ කටයුතු සදහා අවශ්‍ය මුදල් මැතිවරණ කොමිෂන් සභාව විසින් රජයේ මුද්‍රණාලය වෙත ලබා දෙන තෙක් ඡන්ද පත්‍රිකා මුද්‍රණය නොකරන බවයි රජයේ මුද්‍රණාලයේ අධිපතිනිය මැතිවරණ කොමිසම වෙත දැනුම් දී ඇත්තේ.
කෙසේ හෝ මුදල් ලබා දෙන්නේ නම් මුද්‍රණ කටයුතු ආරම්භ කළ හැකි බවද ඇය ප්‍රකාශ කළා.
අද හෝ හෙට දින මුදල් ලැබුණහොත් දින 20ත් 25ත් අතර කාලයක් තුළ මුද්‍රණ කටයුතු සිදු කර අවසන් කළ හැකි බවටයි රජයේ මුද්‍රණාලයේ අධිපතිනි ගංගානි කල්පනා මහත්මිය වැඩිදුරටත් කියා සිටියේ.
