ශ්‍රී ලංකා ක්‍රිකට් ක්‍රීඩාව ප්‍රතිසංවිධානය කිරීම සඳහා සකස් කරන ලද නව ශ්‍රී ලංකා ක්‍රිකට් පනත් කෙටුම්පත රජයේ ගැසට් පත්‍රයේ පළ කිරීමටත්, අනතුරුව අනුමැතිය සඳහා පාර්ලිමේන්තුවට ඉදිරිපත් කිරීමටත් අමාත්‍ය මණ්ඩල අනුමැතිය හිමිව තිබෙනවා. මෙම පනත් කෙටුම්පත සකස් කිරීම සඳහා 2026 ජූනි 08 වැනිදා පැවැති අමාත්‍ය මණ්ඩල රැස්වීමේදී මූලික අනුමැතිය ලබා දී තිබූ අතර, ඒ අනුව නීති කෙටුම්පත් සම්පාදක විසින් සකස් කරන ලද කෙටුම්පත සඳහා මේ වන විට නීතිපතිවරයාගේ නිශ්කාශනය ද හිමිව තිබෙනවා. ශ්‍රී ලංකාවේ ක්‍රිකට් පාලනාධිකාරිය පාලනය, නියාමනය, ප්‍රවර්ධනය, සංවර්ධනය සහ පරිපාලනය කිරීම සඳහා ශ්‍රී ලංකා ක්‍රිකට් ආයතනය සංස්ථාපනය කිරීම මෙන්ම එහි බලතල සහ කර්තව්‍යයන් සඳහා නෛතික විධිවිධාන සැලසීම මෙම පනත මගින් සිදුවනවා. එසේම යහපාලනය, සුපිළිපන්නභාවය, විනිවිදභාවය, වගකිවයුතුභාවය, ඇතුළත්භාවය සහ සමාන අවස්ථා සැලසීම යන මූලධර්මයන් මත පිහිටා ක්‍රිකට් ක්‍රීඩාවේ උන්නතිය උදෙසා කටයුතු කිරීමත්, සියලු සහභාගිවන්නන්ගේ සුබසාධනය ආරක්ෂා කිරීමත් මෙහි ප්‍රධාන අරමුණක්.
