මාතර, දෙවුන්දර ගන්දර පොලිස් වසමේ ඒදණ්ඩ පාර, දෙවුන්දර ප්‍රදේශයේ පිහිටි ධීවර කටයුතුවල නිරත පුද්ගලයෙකුගේ නිවසකට අද අලුයම වෙඩි ප්‍රහාරයක් එල්ල වී තිබෙනවා. පොලීසිය සඳහන් කළේ, මෝටර් රථයකින් පැමිණි පිරිසක් විසින් පිස්තෝල වර්ගයේ ගිනි අවියක් භාවිත කර මෙම වෙඩි තැබීම සිදුකර පලාගොස් ඇති බවයි. වෙඩි ප්‍රහාරයෙන් කිසිදු පුද්ගලයෙකුට අනතුරක් සිදුව නොමැති බවද පොලීසිය සඳහන් කළා. මේ හේතුවෙන් ඒ අවට ප්‍රදේශයේ ආරක්ෂාවද දැඩි කර තිබෙනවා. සිද්ධිය සම්බන්ධයෙන් ගන්දර පොලීසිය වැඩිදුර විමර්ශන ආරම්භ කර තිබෙනවා. මේ සිද්ධිය සම්බන්ධයෙන් ‘දෙහිබාලේ‘ නමැති සංවිධානාත්මක අපරාධකරු
විසින් හඬපටයක් නිකුත් කර තිබෙනවා. මේ අතර ගල්කිස්ස, ටෙම්ප්ලර්ස් පාර ප්‍රදේශයේදී ඊයේ රාත්‍රියේ සිදු කිරීමට ගිය වෙඩි තැබීමේ උත්සාහයක් ගිනිඅවිය ක්‍රියාත්මක නොවීම හේතුවෙන් ව්‍යර්ථ වී ඇති බව පොලිසිය පවසනවා. වෙඩික්කරු වෙඩි තැබීමට උත්සාහ කර ඇති අතර, එම අවස්ථාවේදී ගිනිඅවිය ක්‍රියාත්මක නොවීම හේතුවෙන් කිසිදු පුද්ගලයෙකුට හානියක් සිදුව නොමැති බවයි වාර්තා වන්නේ.
