තමන්ට සිදුකළ අපහාසය වෙනුවෙන් රුපියල් මිලියන 500ක වන්දියක් අයකර දෙන ලෙස ඉල්ලා හිටපු මුදල් අමාත්‍ය රවී කරුණානායක විසින් පාර්ලිමේන්තු මන්ත්‍රීනී කෝකිලා ගුණවර්ධනට එරෙහිව ගොනු කළ නඩුවක් අද (06) කොළඹ දිසා අධිකරණය හමුවේ සමථයට පත් කෙරුණා.
මෙම නඩුව අද කැඳවූ අවස්ථාවේදී විත්තිකාර මන්ත්‍රීවරිය සිය නීතිඥවරු මාර්ගයෙන් අධිකරණයට දැනුම් දුන්නේ, තමන් සිදුකළ ප්‍රකාශය වැරදි සහගත බව තේරුම් ගන්නා බවත්, ඒ සම්බන්ධයෙන් පැමිණිලිකාර රවී කරුණානායකගෙන් කොන්දේසි විරහිතව සමාව අයැද සිටින බවත්ය.
