ග්‍රාම නිලධාරී වසම් මට්ටමින් රට පුරා ක්‍රියාත්මක අඩු ආදායම්ලාභී පවුල් සඳහා සහල් ලබාදීමේ ජාතික වැඩසටහන යටතේ අස්වැසුම ප්‍රතිලාභීන්, වකුගඩු දීමනාලාභීන්, ආබාධිත ආධාරලාභීන්, සමෘද්ධිලාභීන්, වැඩිහිටි දීමනාලාභීන් හා අනිකුත් රෝගාධාරලාභීන් සුදුසුකම් ලබයි. මෙම වැඩසටහනින් පවුල් ලක්ෂ තිස් නවයකට සහල් බෙදාදීම සඳහා රුපියල් බිලියන 126.1 රජය වැය කරන අතර කොළඹ දිස්ත්‍රික්කයේ පමණක් තෝරාගත් පවුල් එක් ලක්ෂ අසතුන් දහසකට මෙම ප්‍රතිලාභය ලැබීමට හිමිකම් ලබයි.
අග්‍රාමාත්‍ය දිනේෂ් ගුණවර්ධන මහතාගේ ප්‍රධානත්වයෙන් අඩු ආදායම්ලාභී පවුල් සඳහා සහල් ලබාදීමේ ජාතික වැඩසටහන සංකේතවත් කරමින් කොළඹ ප්‍රාදේශීය ලේකම් කොට්ඨාසයට අයත් ප්‍රතිලාභී පවුල් සඳහා සහල් බෙදාදීමේ වැඩසටහන ඉකුත් 22දා මට්ටක්කුලිය ශ්‍රී වික්‍රමාරාමයේදී සිදුකෙරිණි.
එහිදී අදහස් දැක්වූ අග්‍රාමාත්‍ය දිනේෂ් ගුණවර්ධන මහතා පවසා සිටියේ කොළඹ නගරයේ ජනතාවටත්, දරුවන්ටත් විශ්වාසවන්තව ජීවත්විය හැකි අනාගතයක් ගොඩ නැංවීම සඳහා අවැසි පරිසරය සකසන බවත් එහි පළමු පියවර ලෙස ඔවුන්ගේ ආහාර සුරක්ශිතතාව සහතික කිරීමේ වැඩසටහන් ආරම්භ කර ඇති බවයි.
